"Lo que viví nun quiero que naide vuelva a vivilo", diz Vicente García Riestra

Riestra ente les autoridaes asturianes.
EUROPA PRESS.
Actualizado 12/06/2018 20:53:05 CET

UVIÉU, 12 Jun. (EUROPA PRES) -

"Lo que viví nun quiero que naide vuelva a vivilo", esi ye'l xuramentu que fixo l'asturianu Vicente García Riestra (La Pola, Siero, 1925) xunto a 80.000 compañeros el día que lliberaron el campu de concentración de Buchenwald, n'Alemaña.

Asina lo afirmó l'últimu español superviviente del esterminiu nazi, que participó esti martes n'Uviéu na presentación del llibru '42.553: Depués de Buchenwald', de Xuan Santori, obra qu'algamó'l Premiu Máximo Fuertes Acevedo del Gobiernu d'Asturies.

Nel actu participó'l conseyeru de Cultura, Genaro Alonso, y el director xeneral de Planificación Llingüística, Fernando Padilla, amás de cuntar cola asistencia de la vicealcaldesa d'Uviéu, Ana Taboada, o'l conceyal de Cultura de la capital, Roberto Sánchez Ramos, amás de diputaos d'IX como Ovidio Zapico o Marta Pulgar, ente otros.

Tolos asistentes enllenaron un auditoriu del Muséu Arqueolóxicu que quedó pequeñu pa la ocasión. García Riestra foi recibíu a la so llegada poles autoridaes y pola música de la Banda de Gaites Ciudá d'Uviéu.

L'últimu español vivu que sufrió l'horror nazi afirmó que dedicó tola so vida, "dende que dexe Alemaña", a lluchar por "espertar a la mocedá". Nesi sentíu, esplicó qu'anque n'Europa yá nun hai guerres, estes tán presentes en tol mundu "y los pequeños sufrimos los golpes, el maltratu, la fame y la privación de llibertá".

Por eso, centró una parte bona de la so vida en dar charles n'institutos franceses cuntando a les xeneraciones nueves lo que vivió. Asina, esplicó que con esta xera busca "defender la llibertá de toos y una vida harmoniosa".

42.553 ye'l númberu que tenía como presu García Riestra nel campu de concentración. Un númberu que, en palabres de Genaro Alonso, representa "la negación del ser humanu y la privación de too derechu, la muerte civil".

El conseyeru destacó del llibru les enseñances qu'ufiertaba sobre "una de les peores époques de la nuestra historia" y un reflexu de la "llucha del ser humana pola supervivencia".

Per otru llau, l'autor del llibru, Xuan Santori, afirmó que conocer a García Riestra fíxolo "meyor persona" y indicó a tolos presentes que nun taben namás con una victima, "tamos con un calter únicu que foi atopar les razones pa sobrevivir".

Santori esplicó que'l llibru nun pon el focu nel horror del xenocidiu nazi, sinón que busca "mostrar un filu de lluz" y una esperiencia vital que conmovió a les persones que participaron nel llibru, dende los miembros del xuráu hasta los editores.

EL LLIBRU

'42.553' narra la vida de Vicente García Riestra, un adolescente asturianu que marchó a Francia per Cataluña depués que cayera'l Frente Norte. Los restos del so pá tán tovía nuna fuesa común n'Uviéu y los del so hermanu, Pepín, "en dalguna cuneta que nun sabemos", dixo Riestra.

Yá en Francia, Riesta comenzó a lluchar na resistencia francesa contra la ocupación nazi, hasta qu'en 1944 foi deteníu en Francia y deportáu pola Xestapo pal campu de concentración de Buchenwald.

Agora yá ta nes llibreríes '42.553', el llibru ganador del Premiu Máximo Fuertes Acevedo d'Ensayu, obra de Xuan Santori, al que Riestra, condecoráu cola Llexón d'Honor francesa, dio'l sí depués de qu'otros autores pidiéran-y escribir la so historia. Hasta'l momentu siempre se negara.