El voceru del Bloque cree'l que'l congresu d'UNA pue ser l'entamu d'una gran amistá y apuesta por un nuevu proyectu

UVIÉU, 08 de Marzu (EUROPA PRESS)

El voceru del Bloque por Asturies, Pablo Fernández, utilizó la célebre frase final de la película 'Casa Blanca' de Michael Curtiz, para espresar les sos impresiones sobre'l II Congresu d'Unidá Nacionalista Asturiana, al qu'asistió como convidáu, en representación de la so formación política: "creo qu'esto pue ser el comienzu d'una gran amistá". Asina, apostó por un "nuevu proyectu" p'Asturies que "ilusione" a la sociedá y dixo que "ye'l momentu" de que'l movimientu asturianista se fixe "no que lo une y non no que lo dixebra".

Nuna corta intervención, Fernández afirmó qu'hai una "identificación fonda" colos plantegamientos espresaos na xornada de clausura del Congresu polos representantes d'esta organización y de los diferentes colectivos y partíos convidaos, la mayor parte d'ellos integrantes del movimientu asturianista nes sos diferentes estayes.

Asina, recordó que "hai dos décades Alfonso Guerra dixo nun mitín en Xixón que si garramos el mapa del Estáu Español y lu doblamos pela metá, Asturies y Andalucía coinciden". Nun paralelismu añadió que "si garramos los programes políticos de les organizaciones asturianistes y les doblamos pela metá, toi seguru de que coinciden, sinón al 100%, sí nun 80% o 90".

Mostró la so conformidá col lema del Congresu, 'Construyendo l'alternativa asturiana'. "Tolos que falasteis equí, dende la mesa, dende los reportaxes, tán na mesma idea. Toi d'acuerdu col lema del congresu, toi d'acuerdu colo que se dixo equí, y taba d'acuerdu con con Santi na Mancomunidá, y con Xuan", en referencia a los dos conceyales qu'esta llexislatura tuva UNA en Carreño, colos que coincidió nos órganos de la Mancomunidá Cabo Peñes (Carreño y Gozón), na so condición de conceyal d'IU-BA nel Conceyu de Gozón.

"Y nun lo digo personalmente", añadió, "sinón como organización". "Creo que ye'l momentu d'empezar a fixase no que mos une. Hasta agora remarcamos sobremanera lo que mos dixebra. Pero ye'l momentu", comentó. Al so xuiciu, "el movimientu asturianista nun ta nos meyores momentos, y la sociedá asturiana tampoco. Asistimos a un bipartidismu mui fuerte. Los grandes medios tienen muncha culpa, pero también nosotros, les pequeñes organizaciones, que nun somos a invitar a la sociedá a una nueva perspectiva. Nun somos capaces a ilusionar", añadió, faciendo una "autocrítica", na qu'incluyó al so propiu partíu. "Necesitamos un proyectu nuevu n'Asturies. Tengo una corazonada fonda". acabó.

LLAMAOS AL TRABAYU CONXUNTU

Nun foi la única intervención nel sen a buscar puntos en común. Sixto Cortina, del PAS, fizo una crítica asemeyada a les relaciones non siempre cordiales que matienen les organizaicones del entornu asturianista, y señaló los munchos puntos en común qu'hai cola so organización, motivu pol que animó a los militantes d'UNA a siguir trabayando y auguró que "mos atoparemos toos nel camín".

Ramón Artime, conceyal d'Unión Independiente de Carreño, mostró'l so apoyu al proyectu d'unificación de la izquierda asturiana sobre'l proyectu d'UNA, y recalcó la "bona sintonía" nos seis años que lleva exerciendo d'edil nel Ayuntamientu col conceyal d'UNA. "Los trés d'UICA y el d'UNA somos prácticamente la única oposición de Carreño", comentó.

Pela so parte, Ignacio González, voceru de Los Verdes d'Asturies, convidó a UNA a trabayar pa buscar acuerdos políticos nel futuru.

Fuera de les fronteres d'Asturies intervinieron representantes d'Aralar y la Chunta Aragonesista, qu'animaron a los militantes d'UNA a siguir trabayando p'algamar la proyeición electoral qu'estes dos organizaciones tienen nes sos respectives comunidaes.

Tamién tomaron la palabra miembros de la Fundación Belenos, l'Academia de la Llingua Asturiana, la organización FAI!, el sindicatu CSI y la Xunta pola Defensa de la Llingua Asturiana.