UVIÉU, 26 de Mayu (EUROPA PRESS)
La compañía aérea Volotea inauguró esti vienres una nueva ruta nel so segundu añu de presencia na comunidá. La conexón con Munich asitia la so ufierta en 10 destinos directos dende l'Aeropuertu d'Asturies y supón el segundu internacional, xunto a Venecia. El conseyeru delegáu y fundador de l'aerollinia, Carlos Muñoz, señaló como aspiración pal 2022 ofrecer ente 15 y 20 destinos dende'l Principáu, seis d'ellos internacionales.
La progresión prevista supón ampliar la ufierta nún o dos destinos cada añu mientres el próximu llustru, siendo polo menos unu d'ellos d'ámbitu internacional. Ente setiembre y ochobre d'esti añu van conocese les nueves rutes que van operar dende Asturies nel 2018, según apuntó en rueda de prensa.
Nesti momentu Volotea opera a 10 destinos dende Asturies: Venecia, Sevilla, Valencia, Mahón, Alicante, Ibiza, Palma, Málaga, Tenerife y Munich. Ente les rutes internacionales que s'embaraxen taría Bruxeles, Frankfurt, Ámsterdam, Milán o Roma.
Pela so parte, el director del Aeropuertu d'Asturies, Carlos San Martín, agradeció a Volotea la so contribución p'ampliar la conectividá del Principáu, que dispón nesti momentu d'una ufierta de 22 destinos, "la mayor ufierta de vuelos de la so historia", con 26 meses consecutivos de crecimientu.
La rueda de prensa, na que taba programada la intervención de Francisco Blanco, qu'anunció esti xueves la so dimisión como conseyeru d'Empléu, Industria y Turismu del Principáu, a lo último contó cola participación del director xeneral de Trabayu, Antonio González. El Gobiernu asturianu informó del cambiu del representante de la Conseyería una hora antes de la presentación.
Antonio González incidió na importancia de consiguir conexones prioritaries, como asocedió l'añu pasáu con Italia y agora Alemaña, dos de los países con mayor fluxu de turistes y relaciones comerciales pal Principáu.
Amás, el xerente de la SRT, Alejandro Calvo, esplicó la campaña de promoción turística que'l Principáu ta desarrollando n'Alemaña pa intensificar tovía más l'enclín que lu asitia como'l segundu país d'orixe de los turistes estranxeros que visiten Asturies.
