UVIÉU, 22 Sep. (EUROPA PRESS) -
L'alcalde d'Uviéu y secretariu xeneral de l'Agrupación Socialista d'Uviéu (AMSO), Wenceslao López, señaló esti xueves énte los refugos nuevos d'asamblees locales a la xestión de la executiva de la Federación Socialista Asturiana (FSA-PSOE), liderada por Javier Fernández, qu'eses negatives demuestren que los participantes na asamblea d'Uviéu nun taben "mui enquivocaos".
Asina, en respuesta a los periodistes enantes de participar nel tradicional repartu del bollu y del vinu nel Día de San Mateo, López remarcaba que foi casualidá, poles fiesta locales, que l'agrupación d'Uviéu fora la primera en celebrar la so asamblea anque nun cree qu'eso influyera n'otres, como Llangréu o Samartín del Rei Aurelio.
"Si otros faen lo mesmo ye que nun tábamos mui enquivocaos", señaló, añadiendo que tanto los votos favorables como los contrarios tienen d'entendese como "dalgo natural y normal" en procesos congresuales.
Ente'l 18 de setiembre y esti xueves, día 21, tán celebrándose asamblees nes distintes agrupaciones socialistes nel marcu de los preparativos del congresu autonómicu que se va desenvolver ente los díes 29, 30 y el 1 d'ochobre, y nel que va salir designáu Adrián Barbón como secretariu xeneral.
Amás, Wenceslao López aprovechó pa recordar el so compromisu de nun volver presentase a la Secretaría Xeneral de la AMSO. L'alcalde d'Uviéu incidió en que la so voluntá yera ocupar el cargu un mandatu namás. "El mio tiempu yá remató. Ye razonable", dixo argumentando que nun se puede ser xuez y parte".
Asina, López afirma que "por ética política" ye "incompatible" ocupar al empar un cargu públicu y ún orgánicu", de tala forma que, dada la so condición d'alcalde, nun va siguir al mandu de la AMSO.
