Wert: EpC "tornó nuna asignatura con una carga d'adoctrinamientu"

CADENA SER

MADRID, 01 de Febreru (EUROPA PRESS)

El ministru d'Educación, Cultura y Deporte, José Ignacio Wert, defendió la sustitución de l'asignatura d'Educación pa la Ciudadanía (EpC) anunciada esti martes nel Congresu de los Diputaos dao que, al so xuiciu, "tornó nuna asignatura con una carga d'adoctrinamientu".

En declaraciones a Cadena Ser recoyíes por Europa Press, Wert esplicó que tal como se concedió curricularmente EpC "diba muncho más allá" de l'asignatura d'educación cívica qu'encamentaba incluyir na enseñanza'l Conseyu d'Europa.

Nesti sen, sorrayó que la eliminación taba incluyida nel programa del PP y qu'esti partíu nun ta en contra d'esta materia si se limita a la conocencia del testu constitucional, de los derechos y deberes y inclúin nociones básiques de los valores de pluralismu, llibertá, democracia y conocencia de les instituciones europees.

Asina, afirmó que los nuevos modelos de familia y los derechos de los homosexuales van caber na nueva asignatura "na midida na que s'espliquen na parte dogmática de la Constitución".

Per otru llau, al respecto de l'ampliación del Bachilleratu cola habilitación del últimu cursu d'educación secundaria, Wert esplicó qu'anque "nun hai uniformidá nos sistemes educativos europeos tocantes a la edá d'acabación de la enseñanza secuandaria", el PP apuesta polos dieciocho años como la edá afayadiza pa p'acabar la enseñanza.

Nesti sen, defendió l'ampliación del bachilleratu y la FP en cuartu d'ESO porque "ye pa casi ún de cada trés estudiantes l'últimu contactu cola educación formal" y mostróse confiáu en qu'al tresformase esi cursu torne nuna vía de diversificación "que funcione tanto como un cursu preparatoriu pa los que van realizar una FP de grau mediu, y como pa centrar meyor a los que siguen bachilleratu".

El ministru esplicó tamién que toa reforma tien dellos enguedeyos de derechu transitoriu y hai que dar tiempu al sistema pa preparar. Por ello, afirmó qu'anque nun quier comprometer una fecha y tienen que falar cola comunidá educativa, falar de setiembre del 2013 "paez un oxetivu razonable".

A lo último, señaló que pa él "lo esencial ye qu'España seya quién a nun doblar la tasa d'abandonu escolar tempranu de la UE".