UVIÉU, 19 Sep. (EUROPA PRESS) -
El portavoz de la Xunta pola Defensa de la Llingua Asturiana (XDLA), Carlos Pulgar, afirmó que cualquier reforma del Estatutu d'Autonomía "tien que llevar a los derechos que reconoz la oficialidá en primer términu".
En declaraciones a Europa Press, Pulgar afirmólo asina depués de que'l secretariu xeneral de Podemos Asturies, Daniel Ripa, anunciara esti martes que yera partidariu de treslladar la reivindicación de la eliminación de los aforamientos a Asturies.
Trátase d'una cuestión qu'esixiría la reforma del Estatutu d'Autonomía, polo que'l debate de la eliminación de los aforamientos vuelve a poner na primer llinia del debate políticu la oficialidá.
Nesti sentíu, el portavoz de la XDLA esplicó que sería "un golpe bien duru" a la credibilidá de los partíos políticos partidarios de la oficialidá "nun tomar el determín d'aprobala cuando se podía facer y postergar, sine die, eses acciones pa un momentu indefiníu onde les dificultaes y la situación pueden ser más abegoses qu'agora".
Por eso, indicó que l'asociación de defensa del asturianu va ser "esixente" con toles fuercies y instituciones p'abrir "yá" una reforma estatutaria "que lleve al reconocimientu de los derechos llingüísticos y facilite la supervivencia del idioma nel futuru".
AFORAMIENTOS Y REFORMA DEL ESTATUTU
El debate sobre la eliminación de los aforamientos garró fuercia esti llunes, cuando'l presidente del Gobiernu central, Pedro Sánchez, anunció la so intención de desanicialos en 60 díes al traviés d'una reforma exprés de la Constitución.
Esti mesmu martes, el Congresu aprobó una moción de Ciudadanos nesi sentíu onde se fala de que los Parllamentos autonómicos van modificar los sos respectivos Estatutos pa desaforar tamién a los sos parllamentarios, como yá empezaron a facer en Murcia, Canaries y Cantabria.
Per otru llau, tamién el martes, el secretariu Xeneral de Podemos Asturies, Daniel Ripa, defendió "treslladar la reivindicación a Asturies" enantes de qu'acabe la llexislatura. Una midida que pasa pela reforma del Estatutu y onde Ripa esplicó que tamién son partidarios d'apoyar "cualquier midida en materia d'igualdá y de blindar derechos que xenere mayoríes abondo".
Esa mesma mañana, el conseyeru de Presidencia y Participación Ciudadana, Guillermo Martínez, afirmó sobre la posibilidá de reformar l'Estatutu d'Autonomía pa tratar los aforamientos n'Asturies, que yera una decisión que depende de la Xunta Xeneral y de los grupos parllamentarios.
