La XDLA critica que la declaración institucional a favor de la sidra "nun fai referencia nenguna a l'asturianu"

Taller en la Feria de la Sidra
AYUNTAMIENTO - Archivo
Actualizado: miércoles, 6 junio 2018 11:06

UVIÉU, 6 Jun. (EUROPA PRESS) -

La Xunta pola Defensa de la Llingua Asturiana (XDLA) criticó que na declaración institucional de la Xunta Xeneral a favor de la sidra nun fai referencia a la llingua asturiana y nun tien una versión nesti idioma "cuando ye parte indisociable de la cultura de la sidra".

Al traviés d'una nota de prensa, l'asociación cultural criticó que la declaración, que quier apoyar la candidatura de la sidra como patrimoniu inmaterial de la humanidá nun tuviera referencia nenguna a la relación de la sidra y la llingua. La declaración aprobóse por unanimidá'l 18 de mayu pasáu a propuesta del grupu de Podemos.

"Nesta declaración nun se fai referencia a la llingua asturiana en nengún momentu y llama l'atención que tampoco nun s'acompañe d'una versión escrita nesta llingua siendo como ye parte indisociable de la cultura de la sidra, una cultura que s'espresa n'asturianu", señala la XDLA.

Por eso, recuerden que tol ritual de la sidra, dende pañar la mazana hasta que s'echa un culín, tien como idioma d'espresión l'asturianu, llingua que la Unesco reconoció como una de les llingües en peligru y polo qu'instó a les alministraciones a tomar les midíes necesaries pa evitalo, polo que pa la Xunta'l vocabulariu de la sidra tendría que un "aspectu fundamental nesta propuesta".

"Pareznos una estratexa equivocada defender la cultura sidrera d'Asturies como patrimoniu inmaterial escaeciendo a costafecha la realidá llingüística que val de vehículu pa espresar y dar nome a cada elementu d'esa cultura", afirma la organización, que pide a l'Alministración y a la Xunta Xeneral "que corrixan esa carencia y que-y dean a la llingua asturiana'l papel protagonista que tien na cultura de la sidra".

Asturianu ofrecido por