Mercedes Fernández recibe'l 'Madreñazu' de la XDLA pol so "discursu del odiu" hacia l'asturianu
UVIÉU, 15 Dic. (EUROPA PRESS) -
La líder del PP d'Asturies, Mercedes Fernández, recibió "pol so discursu del odiu" hacia l'asturianu'l 'Madruñazu' de los Premios Andrés Solar qu'entrega esti sábadu en Xixón la Xunta pola Defensa de la Llingua Asturiana (XDLA). Mentanto, la versión positiva, el 'Pegollu', va pal llabor del fútbol n'asturianu representáu nos equipos U.C. Ceares, Rosal F.C., C.F.F. Llosalín y C.D.E. Stiaua d'Asturies.
Los Premios Andrés Solar, que lleguen a la so XXXIII edición, tienen la vertiente doble de premiar a una entidá o persona que rescamplara pol so llabor en defensa o promoción del asturianu (Pegollu) y a la persona o entidá que rescamplara pol so llabor negativu pa cola llingua asturiana (Madreñazu).
El Pegollu d'esti añu 2017 quier reconocer el llabor del fútbol n'asturianu representáu nos equipos U.C. Ceares, Rosal F.C., C.F.F. Llosalín y C.D.E. Stiaua d'Asturies, "que vienen llevando alantre proyectos deportivos populares y cooperativos, y que visibilicen l'asturianu nos diferentes materiales que xenera la so actividá".
El Madreñazu foi pal discursu del "odiu y xenófobu" de la líder del PP asturianu Mercedes Fernández, "qu'a lo llargo de los últimos tiempos vien faciendo unes declaraciones cada vez más delirantes y ridícules contra la recuperación del asturianu col únicu fin de arrampuñar cuatro votos de los sectores más ultres y casposos de la sociedá asturiana".
La entrega de los Premios va facese esti sábadu 16 d'avientu a les 18.30 hores nel Antiguu Institutu de Xixón y depués del actu va haber una espicha nel Antiguu Institutu mesmu.
