UVIÉU, 15 Jun. (EUROPA PRESS) -
La Xunta pola Defensa de la Llingua Asturiana (XDLA) pidió a la delegada nueva del Gobiernu n'Asturies, Delia Losa, que ponga fin a los recursos xudiciales contra les Ordenances del Asturianu que llevó alantre Gabino de Lorenzo. Amás, quieren que negocie coles instituciones del Estáu l'usu de la toponimia oficial asturiana.
Al traviés de nota de prensa, la XDLA acusó a Gabino de Lorenzo de "atacar" la llingua y l'autonomía de los conceyos al actuar como "executor" de los "prexuicios" del PP al recurrir xudicialmente Ordenances y Planes de Normalización que quixeron poner en marcha conceyos como Noreña, Bimenes o Carreño.
Too eso, según la XDLA, a pesar de que la Llei d'Usu y Promoción del Asturianu señala que los conceyos tienen potestá pa exercer la so propia política llingüística", polo qu'esperen que Delia Losa siga otru camín, "el del respetu a l'autonomía municipal y a la llexislación llingüística asturiana".
Amás, solicíten-y que como delegada del Gobiernu principie les xestiones necesaries pa que toles instituciones del Estáu respeten la toponimia asturiana oficial, tanto en señalizaciones como nel usu alministrativu.
