UVIÉU, 09 de Payares (EUROPA PRESS)
El xerente de Coxersa, Santiago Fernández, indicó güei na Xunta Xeneral del Principáu que "nesti momentu Coxersa nun recibió tovía nenguna instrucción" pa ponese a trabayar na puesta en marcha de la Planta de Valorización Enerxética, más conocida como la incineradora de Serín.
Asina lo manifestó na Xunta Xeneral del Principáu nel marcu de les comparecencies informatives sobre la Estratexa de Desarrollu Sostenible del Principáu d'Asturies, un documentu aprobáu yá hai casi un añu per parte del Conseyu de Gobiernu.
Santiago Fernánez manifestó que dende que nel 2003 aprobóse'l Plan de futuru de Coxersa, el consorciu ta trabayando en toles cuestiones que se planteguen, menos na incineradora, pa la que tán faciendo tovía estudios y alderiques públiques que "tovía nun acabaron".
"El que debía decidir si'l debate sobre la incineradora ta o non abiertu nun soi yo, porque yo soi sólo'l xerente de Coxersa. Nesti momentu, en Coxersa tamos a la espera de que se mos dean instrucciones sobre esta actuación del plan de futuru, mientres tamos trabayando nel restu de midíes recoyíes nel mesmu", dixo Fernández.
Nesti sen, indicó que lo que se fai en Coxersa ye lo que s'encarga per parte de la Xunta de Gobiernu del consorciu y poro entiéndese que cualquier decisión sobre la incineradora debe partir d'ehí, d'esa Xunta de Gobiernu.
Per otra parte, manifestó que'l documentu que'l documentu a debate na Cámara recueye non sólo lo que ta faciendo y debe facer Coxersa, sinón tamién lo que deben facer otres alministraciones, y añadió que considera que lo que se recueye ye lo apropiao.
OTRES INTERVENCIONES
La representante de la Coordinadora Ecoloxista d'Asturies, Patricia Redonda, mostró dalgunes crítiques hacia'l documentu y destacó l'incumplimientu de compromisos anteriores al mesmu. "Tamos nuna Asturies colos problemes medioambientales muncho más agravaos y échense de menos les verdaderes presiones y amenazes", dixo.
Redonda indicó que pa los ecoloxistes esti documentu más qu'una estratexa de futuru ye una "declaración d'intenciones".
Pela so parte, el presidente de Copae, Javier González, afirmó que la producción agraria ecolóxica nun ta bien recoyida nin valorada nesti documentu. Indicó que cabe esperar que nun futuru se contemple l'agricultura ecolóxica como ferramienta eficaz.
El presidente de la FACC, Juan Pereiro, indicó que pel momentu tovía nun se debatió nel senu de la FACC el documentu sobre'l que güei ofreció la so valoración, polo qu'aseguró que dichu apoyu al documentu fízolo en calidá de presidente de la FACC.
Tamién intervino'l rector de la Universidá d'Uviéu, Vicente Gotor, que recordó'l compromisu de la institución académica asturiana, cola sostenibilidá, que se basa nel conocimientu de los que dende la Universidá trabayen nesi ámbitu.
Na primer parte de la comisión comparecieron el xerente de Coxersa, Santiago Fernández, el director de Soxepsa, José María Quirós, el presidente de Copaez, Javier González Aguilar, el director xerente de Cadasa, Antonio Suárez Marcos; el presidente de la Federación de Parroquies Rurales, y el presidente de la Federación Asturiana de Conceyos, Juan Pereiro.
Na segunda parte, tocó-y el turnu a los representantes sindicales d'Asaxa, UCA, COAG, UXT y CC.OO. Tamién dieron la so visión sobre'l documentu un representante de la Federación Asturiana d'Empresarios, la Confederación Asturiana de la Construcción, asina como los colectivos ecoloxistes. Yá nun tercer bloque interviernieron dellos representantes de universidaes, ente ellos, el rector de la d'Uviéu, Vicente Gotor.