UVIÉU, 28 de Xineru (EUROPA PRESS)
El xerente del Institutu pa la Reestructuración del Carbón y Reactivación de les Comarques Mineres (IRMC), Juan Miguel Benítez Torres, nun acudió esti miércoles a comparecer na comisión parlamentaria asturiana qu'investiga la xestión de los denominaos 'fondos mineros' y la supuesta fortuna tapecida del históricu líder mineru José Ángel Fernández Villa.
Benítez Torres taba citáu a les 17.30 hores pa emprestar testimoniu sobre la situación y circunstancies de los fechos oxetu d'investigación y sobremanera lo que conociera en relación a los mesmos dende la perspectiva de los distintos cargos que desempeñó y, sobremanera, pola so conocencia de tolo rellacionao cola xestión de los proyectos empresariales, lo mesmo que de los fondos mineros derivaos de los planes de la minería 1998-2005 y 2006-2012.
En llamándolu al comparecer, la comisión pudo comprobar que Benítez Torres nun acudiera. Nesi momentu, los miembros de la comisión caltuvieron una nueva xunta a puerta zarrada p'analizar ésti y otros incidentes .
Darréu, nos pasiellos de la Xunta Xeneral d'Asturies, el presidente de la Comisión, Ignacio Prendes (UPyD) mostró'l so malestar pola ausencia de Benítez Torres. Esplicó que, a pesar de que lu citaron en tiempu y forma, Benítez Torres llendóse a enviar esti martes un escritu que nun llegaba a una llinia de testu nel que dicía que nun diba dir a comparecer.
En recordando que la Xunta Xeneral d'Asturies ficiera hasta frente a gastos económicos pa la comparecencia, incluyíu l'hotel d'estancia n'Asturies, Prendes consideró una "falta de respetu" hacia tolos asturianos l'actitú de Benítez Torres.
