El xuegu de los bolos, Bien d'Interés Cultural inmaterial nuevu

Contador
Juego de los bolos
EUROPA PRESS
Publicado 11/10/2017 13:45:07CET

UVIÉU, 11 Oct. (EUROPA PRESS) -

El Gobiernu del Principáu d'Asturies aprobó esti miércoles la declaración de bienes d'interés cultural (BIC) del xuegu de los bolos, na categoría de BIC inmaterial.

Igualmente, inclúyese la vía de la Carisa y el ramal tramontanu de la ruta de la Plata, lo mesmo que de los xacimientos arqueolóxicos de Picu L.lagüezus, Monte Curriel.los y L'Homón de Faru, nos conceyos de L.lena y Ayer, na categoría de vía histórica.

L'Executivu autonómicu incide en que'l xuegu tradicional de los bolos ye'l de "más relevancia" na historia asturiana y la so pervivencia "constata la so importancia cultural grande". D'orixe bien antiguu -el primer documentu conserváu data de 1495-, algama'l so puxu mayor nel sieglu XIX y una parte importante del XX. Existen referencies sobre cientos de boleres en tol Principáu, xeneralmente asitíaes xunto a ilesies o en chigres.

"El valor de los bolos nun se llinda namás al xuegu, sinón que engloba otres conocencies y actividaes profesionales y artesanales que lo arriquecen. La práctica ta enraigonada fondamente na cultura popular y aparez con frecuencia nel cancioneru, el llinguaxe coloquial, la mitoloxía, la lliteratura o la pintura. Amás, existe una federación de bolos dende 1962 y hai decenes de peñes pol territoriu", apunten dende'l Gobiernu del Principáu.

Per otru llau, la declaración BIC de la vía Carisa foi informada favorablemente pol Conseyu de Patrimoniu Cultural a principios del pasáu añu y, darréu, incluyóse na mesma categoría de protección patrimonial -vía histórica- los xacimientos arqueolóxicos del Picu L.lagüezos, Monte Curriel.los y L'Homón de Faru, cola so propia delimitación na redolada de protección.

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies