El xuez da la razón a un particular que denunció a la empresa xestora del Güerna pol atascu del 2008

   Un Xulgáu de primer instancia d'Uviéu dio la razón a un particular que denunció a la empresa concesionaria de l'autopista del Güerna (AP-66), al ser ún de los afectaos del atascu rexistráu ente los díes 14 y 15 d'avientu del 2008 por mor de la nieve.

   Según confirmaron a Europa Press fontes de la compañía, la empresa decidió recurrir la citada sentencia, que se presentará mañana públicamente per parte de la Unión de Consumidores (UCE) nuna rueda prensa qu'ofrecerá n'Uviéu.

   Naquel mes d'avientu del 2008 fueron cientos los vehículos que quedaron atrapaos na autopista de peaxe, teniendo qu'intervenir los servicios d'emerxencia y hasta la Unidá Militar d'Emerxencies.

   Tanto la Delegación del Gobiernu n'Asturies como la sodelegación de Lleón realizaron unos informes sobre lo asocedío que remitieron a Fomentu. Asina, la Delegación del Gobiernu nes Sociedaes Concesionaries d'Autopistes de Peaxe, dependiente del Ministeriu, entamó a redactar una propuesta de sanción contra Aucalsa.

   Sicasí, l'espediente de sanción tovía nun se conoz y sigue pendiente d'Abogacía del Estáu, según señalaron recientemente fontes de Fomentu.