MADRID, 18 de Xunetu (EUROPA PRESS)
El xuez de l'Audiencia Nacional Santiago Pedraz dexó en llibertá condicional al auditor de la empresa de redes WiFi Gowex Jose Antonio Díaz Villanueva y dio-y un plazu de 15 díes pa que deposite una fianza de 200.000 euros, informaron fontes xurídiques.
El maxistráu considera que l'auditor, trabayador de la empresa M&A Auditores "dio la cobertoria necesaria" al expresidente de la compañía pa falsiar les cuentes na última década. Apunta, nun autu fechu públicu esti vienres, que Díaz Villanueva cuenta con capacidá económica abondo, dao que los sos últimos ingresos declaraos suben a 300.000 euros.
"Llama l'atención la forma na que se-y pagaba pol so trabayu y que nin lo declarara a la Facienda Pública", asegura Pedraz. L'auditor presentóse voluntariamente esta mañana ante'l Xulgáu Central d'Instrucción númberu ún pa declarar, dempués de qu'ayeri s'ordenara la so busca y captura al nun alcontralu, según informaron fontes xurídiques.
El xuez dexó, amás, en llibertá sin la imposición de midíes cautelares, al conseyeru de Gowex Javier Solsona, al que tamién tomó declaración como imputáu a lo llargo de la mañana.
Mientres l'interrogatoriu l'auditor caltuvo que nun recibió "indicación nenguna" del expresidente de la empresa "nel sen de cómo tenía de faer les auditoríes", Jenaro García. Pedraz apunta, sicasí, que García manifestó nuna conversación con Solsona "que l'auditoría yera falsa y fecha pa dar cobertoria a les cuentes falses".
