UVIÉU, 16 de Xunu (EUROPA PRESS)
Los xulgaos de violencia sobro la muyer d'Uviéu y Xixón, asina como los xulgaos de les distintes poblaciones asturianes competentes en materia de violencia de xéneru sumaron un total de 4.055 asuntos rexistraos, ente penales y civiles, mientres el 2016.
Asina lo recueye la Memoria Xudicial correspondiente al pasáu añu qu'esti vienres presentó'l presidente del Tribunal Superior de Xusticia d'Asturies (TSXA), Ignacio Vidau.
En concreto, el xulgáu de violencia sobre la muyer ubicáu n'Uviéu rexistró un total de 626 asuntos penales y 144 civiles. Amás rexistráronse 184 ordes de protección de les qu'a lo último adoptáronse 86. La memoria constata un suave "aumentu" del númberu d'asuntos penales ingresaos.
El xulgáu de violencia sobre la muyer de Xixón, pela so parte, rexistró 1.230 asuntos penales y 75 civiles. Solicitáronse 216 ordes de protección de les que s'adoptaron 142.
Nel restu de xulgaos de les distintes árees d'Asturies con competencia sobre asuntos penales y civiles en violencia de xéneru, rexistráronse un total de 1.418 asuntos penales y 90 civiles. De los procesos penales resolviéronse 1.391; mientres que de los civiles resolviéronse 92.
Produxéronse aumentos nel númberu d'asuntos penales rexistraos en comparanza col 2015, cuando se rexistraron daqué menos de 1.200 asuntos frente a los 1.418 de 2016. Nestos xulgaos concediéronse un total de 263 ordes de protección y refugáronse 132.
A ello sumen los 472 xuicios rápidos celebraos nos xulgaos d'instrucción d'Asturies rellacionaos con procesos sobre violencia doméstica.
