XIXÓN, 18 Abr. (EUROPA PRESS) -
El Xulgáu d'Instrucción númberu 5 de Xixón decretó esti miércoles llibertá provisional pa los trés últimos miembros del grupu 'Ultra Boys' deteníos esti martes pasáu pola agresión en grupu asocedida la madrugada del día 8 pasáu nun chigre de Cimavilla, onde celebraba una fiesta l'O.C. Ceares, confirmaron a Europa Press fontes xurídiques.
La decisión del Xulgáu oldea, en parte, cola pitición de la Fiscalía d'Área de Xixón, que pidiera l'ingresu en prisión provisional comunicada y ensin fianza pa ún d'ellos.
Subsidiariamente, sicasí, solicitara que se-y impunxera a esti la obligación de comparecer tolos díes 1 y 15 de cada mes nel Xulgáu y cuantes veces sía necesario pa la práctica de les dilixencies que se consideren oportunes, y la prohibición d'acceder y averase a menos de 500 metros al llugar de los fechos.
Pa los otros dos deteníos, la Fiscalía pidiera la obligación de comparecer tolos díes 1 y 15 de cada mes nel Xulgáu y cuantes veces sía necesario pa la práctica de les dilixencies que se consideren oportunes, y la prohibición d'acceder y averase a menos de 500 metros al llugar de los fechos.
Hai que recordar que la Policía detuviera a otros cinco 'ultres' la selmana pasada polos mesmos fechos, de los que se decretó prisión provisional pa trés d'ellos.
A los ocho arrestaos pol asaltu al chigre acúsenlos de desordes públicos, anque a ún d'ellos impúten-y amás un delitu de mancadures, por supuestamente agredir na cabeza con una barra metálica a un veceru del local, qu'intentaba torgar que volvieren entrar nel establecimientu.
