MADRID, 31 d'Ochobre (EUROPA PRESS)
El Xulgáu d'Instrucción Númberu 21 de Madrid treslladó al Ministeriu Públicu qu'entame dilixencies previes pa determinar si l'Hospital de la Paz-Carlos III aplicó toles midíes de cara a garantizar la seguridá del personal y la formación de los trabayadores pa tratar casos d'ébola.
El xulgáu adopta esta decisión al entender que'l relatu de la denuncia "presenta les característiques que faen presumir la posible esistencia d'una infracción penal".
Nun autu, al que tuvo accesu Europa Press, encamienta a la Fiscalía a atropar tola documentación sobre les midíes de seguridá y les iniciatives de formación aplicada, asina como una relación de les persones asistentes a los cursos de formación, quién los emprestó.
Tamién reclama les relaciones de médicos, enfermeres y auxiliares d'enfermería que tuvieron en contactu col virus. Aparte, encarga un oficiu a la Inspección de Trabayu con cuenta de qu'envíe actes o informes instruyíos en relación a la denuncia. Frente a esta resolución, indica'l xulgáu, cabe interponer un recursu nel plazu de trés díes.
Delles organizaciones sindicales y colectivos profesionales mostraron la so intención de rexistrar denuncies a partir de la crisis del ébola al entender que nun se publicaren les midíes de seguridá y formación necesaries. Otros colectivos yá rexistraron denuncies primero que se xestionara'l primer casu d'ébola n'España.
