UVIÉU, 29 de Xineru (EUROPA PRESS)
La Xunta de la Escuela de Maxisteriu de la Universidá d'Uviéu refugó güei en votación la propuesta de nueves especialidaes, llamaes menciones, plantegada pola direición del centru. Tres más de dos hores y media de conceyu, 48 representantes votaron a la escontra de la mesma, frente a 23 a favor, según fontes universitaries.
La propuesta inicial de la comisión encargada de la so ellaboración plantegaba seis menciones: Llingua Española, Matemátiques, Conocimientu del Mediu, Educación Física, Educación Especial y Educación Artística. Tres dellos discutinios, el plantegamientu sufrió dalgunes modificaciones, quedando matemátiques y llingua incluyida nuna mesma mención, Estructurales; n'otra, diban tar educación musicial y artística; y diba añadise otra, Llingua Estranxera (inglés o francés).
A lo último, el vicerrectoráu d'Ordenación Académica reduxo la propuesta final a cuatro especialidaes: Llingua y Matemátiques; Educación Física y Artística, Conocimientu del Mediu y Educación Especial. Quedaben poro fuera la mención d'Educación Musical, la de Llingua Estranxera y la d'Asturianu, que se propunxere hai unos meses dende'l Seminariu de Filoloxía Asturiana de la Facultá de Filoloxía.
Según confirmaron a Europa Press persones presentes nel alderique, la discusión foi "tensa" y "agria", con cruces de dures acusaciones, p'a lo último acabar nuna votación na que 48 votos refugaron el plan frente a 23 que lu apoyaron.
Pese a que la votación foi secreta, dalgunos profesores y representantes de los estudiantes realizaron intervenciones que puen resumir dalgunes causes del resultáu. Primó l'aspeutu d'una posible falta de participación y d'un equipu téunicu encargáu d'ellaborar la propuesta, si bien la comisión docente responsable de preparala elixérala'l propiu profesoráu.
Polo menos tres profesores realizaron intervenciones favorables a la creación d'una mención d'asturianu. El descarte d'una mención concreta d'Educación Musical tamién xeneró ciertos refugos ente los docentes.
Per parte del alumnáu intervinieron dellos de los estudiantes con representación na Xunta, ente ellos Carlos Suárez, que criticó que se pretenda "recuperar la figura del profesor xeneralista que pue dar dende Inglés hasta Educación Física; eso ye volver 50 añós atrás nel sistema educativu".
La direición del centru tien de volver entamar la ellaboración d'una nueva propuesta que deberá sometese a votación. Según confirmaron fontes de la Facultá, la comisión qu'ellaboró l'anterior se disolvió tres el resultáu negativu algamáu, con casi'l 75% de los votos a la escontra.
A FAVOR DEL ASTURIANU
El refugu a la inclusión d'una especialidá d'asturianu nos futuros estudios de Maxisteriu criticárase tanto dende la Xunta pola Defensa de la Llingua, como por tolos sindicatos d'enseñanza: Suatea, UXT, CC.OO, ANPE y CSIF.
La Xunta organizó esta mañana una concentración ante la escuela, a la que fueron representantes de les centrales sindicales, amás de formaciones polítiques como Izquierda Unida (Javier Francisco García Valledor, diputáu autonómicu), Bloque por Asturies o Unidá Nacionalista Asturiana.
Dellos de los concentraos tuvieron hasta'l final de la votación, portando una pancarta a favor de la escolarización n'asturianu y dellos cartelos que demandaben la presencia de la llingua na universidá.
