UVIÉU, 30 d'Ochobre (EUROPA PRESS)
La Xunta Moza, organización de mocedá de la Xunta pola Defensa de la Llingua Asturiana, entamó güei una campaña reivindicativa "pola inclusión del asturianu nos planes d'estudios universitarios
como títulu de grau". La iniciativa entamó con una aición nel Campus del Milán que consistió nuna instalación de cuatro pancartes, nun repartu de dípticos y una pegada de cartelos.
Al traviés d'un comunicáu, la organización informó de qu'ésta "ye la primer aición d'una riestra d'elles que quieren esponer lo que la organización pro defensa del asturianu piensa del encaxe que ha tener la llingua propia d'Asturies na Facultá de Filoloxía".
"A estes altures, depués de pidir la propia Facultá de Filoloxía en 1996 la creación d'una llicenciatura de Filoloxía asturiana, qu'igualara l'idioma d'Asturies no académico a les demás llingües peninsulares, nun se pue contemplar otra cosa que nun seya equivalente a esti pidimientu", afirmó la organización. "El marcu académicu européu nuevu nun pue valir como sida p'arrequexar l'asturianu nuna categoría menor", añadió'l testu.
Pa la Xunta, "hai que sorrayar que, siendo la Universidá la institución cultural más importante de la sociedá, nun pue ser cómpliz de la marxinación y l'amenorgamientu que carez l'asturianu". Según el comunicáu, "el fechu de perdese a lo último del cursu pasáu una votación de cálter políticu contra una propuesta que técnicamente asitiaba l'asturianu nun sitiu dignu pa cualquier llingua, nun val d'escusa pa renunciar a ello". La organización pide poro "la inclusión del asturianu como un títulu de grau a sabiendes de que p'algamalo nun hai más que materializar les bones pallabres y los xestos, tornándolos nuna realidá concreta na que la llingua propia d'Asturies tenga el sitiu que merez".