UVIÉU, 27 d'Abril (EUROPA PRESS)
La presidenta de la Xunta de Personal Docente y máxima responsable de Suatea, Beatriz Quirós, anunció güei que los sindicatos van recurrir ante los tribunales los nuevos baremos de valoración de méritos pa les oposiciones d'educación primaria porque "cambiaron radicalmente". Como exemplu, esplicó que los cursos de llingua asturiana yá nun vienen espeyaos nellos.
Asina lo criticó Quirós, xunto con Gumersindo Rodríguez (ANPE), José Ángel Piquero (CC.OO) y Gerardo Domenech (CSI-CSIF). Estos cuatro sindicatos ofrecieron güei una rueda de prensa p'anunciar la so intención de denunciar la convocatoria, publicada'l sábadu, y facer un llamáu a la fuelga na enseñanza pública convocada por ellos pa mañana, en reivindicación de la creación de la Mesa Sectorial d'Educación y la retirada de plan d'evaluación docente.
Los sindicatos critiaron les modificaciones "radicales" de los baremos de valoración de méritos de formación permanente pa les próximes oposiciones de primaria, convocaes el pasáu sábadu. "Somos la última comunidá en convocar, la convocatoria ye d'un organismu que nun ye d'Educación (en referencia al institutu Adolfo Posada) y se produz esti cambiu cuando tolos interinos, tola xente que ta trabayando y la que ta preparando oposiciones, tienen una serie de cursos qu'agora nun se-yos valorarán", aseguró Quirós.
Un exemplu que punxo de la modificación son los cursos de Llingua Asturiana, que, según la representante sindical, enantes apaecíen espeyaos nel baremu y agora non.
Los sindicatos anunciaron que tán recibiendo abondes llamaes de profesores preocupaos por esti tema, y que lo van llevar a los tribunales.
Dende'l puntu de vista de Quirós, ye una consecuencia más de la falta d'una mesa sectorial, na que se "negocien los temes con quien sabe". "Nós sabemos d'educación y la Conseyería tamién, pero l'Adolfo Posada non. Ta armando un tracamundiu tremendu. Otra razón pa dir mañana a la fuelga", añadió la representante sindical.
FUELGA
Los sindicatos realizaron un llamáu públicu al paru de mañana, tres quedar refugada definitivamente na Mesa Xeneral de Función Pública la posibilidá de crear una mesa sectorial d'educación, la principal demanda de les organizaciones convocantes del paru.
Anunciáronlo dempués de producise'l conceyu de la Mesa Xeneral. Nella, los sindicatos representaos (CC.OO, UXT, Usipa y Cemsatse) y el Gobiernu debíen votar la propuesta de creación de meses sectoriales de dellos ámbitos de l'Alministración, ente ellos la educación. Votaron a favor Usipa y Cemsatse, CC.OO astúvose y UXT votó a la escontra. Al nun haber unanimidá sindical, el Gobiernu decidió astenese, polo que la iniciativa salió refugada.
Ante esti resultáu, y la non retirada del plan d'evaluación, que'l Gobiernu aceptó modificar en dalgunos de los sos puntos pero nun paralizar, como piden los sindicatos, les cuatro centrales ficieron güei un llamáu a la participación na fuelga convocada pa mañana. La movilización afeuta a tolos centros públicos de primaria y secundaria.
Criticaron amás mui duramente l'actitú del Gobiernu, y de los sindicatos UXT y Usipa na Mesa Xeneral. "El Gobiernu ta portándose como un trileru. Dao que pa que se convocare la mesa sectorial tenía qu'haber unanimidá sindical, cualquier cosa que se faiga ta viciada porque la UXt yá anunciare que diba votar a la escontra. Pretenden rise del profesoráu", llamentó la presidenta de la Xunta de Personal.
Dende'l so puntu de vista, "el papel de la UXT ye mui triste, teniendo en cuenta qu'hai un mes taba detrás de la pancarta convocando una fuelga por dos puntos: la mesa sectorial y la retirada del plan d'evaluación".
Gumersindo Rodríguez (ANPE) atacó tamién a Usipa, por valir, xunto cola UXT, de "sindicatu útil" al Gobiernu. Criticó asina l'acuerdu qu'estos dos sindicatos y el Principáu anunciaron el vienres, pol que se modificaba'l plan d'evaluación y s'acordaba'l desarrollu normativu de la carrera profesional. Según Rodríguez, esti sindicatu tien una representación mínima nel sector docente, pues nes últimes elecciones llogró 167 votos d'un colectivu de 12.000 profesores.
Pela so parte, José Ángel Piquero matizó la postura de CC.OO, dao que los periodistes-y entrugaron por qué la federación del so sindicatu reivindica la mesa sectorial, mientres la so direición rexonal s'astién na xeneral. "CC.OO negóse a tratar esti puntu porque yá se sabía que nun se diba aprobar, dao que'l Gobiernu exixía unanimidá y el so sindicatu, la UXT, yá manifestare que diba votar a la escontra", esplicó. "La postura de CC.OO ye qu'haya mesa sectorial", añadió.
