UVIÉU, 27 de Mayu (EUROPA PRESS)
La Xunta Pola Defensa de la Llingua Asturiana criticó esti miércoles la "intencionalidá represiva" contra la llingua asturiana, tres la retirada de les papeletes electorales d'Andecha Astur nes elecciones del pasáu domingu, "reinterpretando dalgunos presidentes de mesa la resolución de la Xunta electoral".
Nuna nota prensa, la Xunta considera qu'esta actitú "muestra la represión y el castigu exercíu sobre los asturfalantes y l'incumplimientu de la llexislación vixente, tanto a nivel asturianu como español y européu". Por eso, la XDLA "pide a tolos partíos políticos que van tar representaos na Xunta Xeneral nueva que dean pasos alantre pa poner fin a estes actitúes propies d'un periodu predemocráticu".
Y ye que la existencia de mayoríes nueves va permitir -si les otres partes nun exercen un bloquéu- "avanzar llexislativamente nel reconocimientu de derechos y nel desarrollu real d'una planificación llingüística afayadiza pal casu asturianu". De la mesma manera, "hai que recordar qu'en tolos conceyos del país van tar representaos partíos políticos que llevaben nel programa un compromisu esplicitu col idioma de la nuestra tierra", consideró la organización. La XDLA espresa la importancia "de desarrollar una política lingüística a nivel de los conceyos. Quier dicise, dende les alministraciones más averaes al ciudadanu".
Por eso, la organización pide a tolos conceyos asturianos que "dean pasos alantre na recuperación de la toponimia tradicional -hailo tovía que nun dio'l primer pasu pa empezar el procesu-, na estabilidá de los servicios de normalización y nos derechos llaborales de los sos empleaos, y nel desarrollu d'una política llingüística municipal, midíes que munches veces nun suponen nengún costu añadíu".
"Otra manera, hai que volver a insistir en qu'a nivel autonómicu ye preciso tamién dar pasos alantre p'acabar colos casos claros de represión exercíos contra les persones que quieren utilizar el so idioma na vida cotidina y nel exerciciu de los sos derechos democráticos como ciudadanos", acaba la organización.
