UVIÉU, 03 de Setiembre (EUROPA PRESS)
La Xunta pola Defensa de la Llingua Asturiana exixó esti llunes al Gobierno asturianu, per mediu d'una nota prensa, que s'informe a los centros d'enseñanza de la supresión de la ratio mínima pa formar clases d'asturianu. Asina afirma que tán empezando a llegar quexes de maniobres de determinaos centros que siguen inorando les disposiciones llegales qu'anulen la ratio mínima d'estudiantes pa poner clase d'asturianu. Por eso, la XDLA quier que se remarque esti aspectu na Circular de principiu del cursu y que se monitorice tol procesu de matriculación.
Según la Xunta, la Conseyería d'Educación, Cultura y Deporte lleva unes selmanes anunciando en BOPA modificaciones en delles resoluciones p'adaptales al cumplimientu de la sentencia del 17 de setiembre de 2010 del Tribunal Superior de Xusticia d'Asturies, ratificada en sentencia del Tribunal Supremu n'abril de 2012.
Recuerda que la Resolución del 16 de mayu de 2008, pola que s'afitaba la ufierta y les condiciones pa la elección de materies optatives y materies opcionales pa la Educación Secundaria Obligatoria, tuvo'l so necesariu recursu de parte de CCOO, acabando en sentencia qu'anulaba l'artículu 5.1 de la mentada resolución, lo que suponía l'abolición de la ratio mínima d'estudiantes requeríos pa impartir l'asignatura de Llingua Asturiana.
Según la organización, les autoridaes del Gobiernu asturianu, col daquella conseyeru Herminio Sastre a la cabeza, mostraron "el so despreciu testerón pola llegalidá y les perres públiques cola presentación d'un recursu en casación que, como nun podía ser d'otra manera, acabó en confirmación de la sentencia y la condena a costes de l'Alministración asturiana".
D'esta manera, señala la Xunta, publicábase en BOPA una resolución de la Conseyería d'Educación, Cultura y Deporte del 18 de xunu que resuelve executar nos sos propios términos la sentencia de 17-09-2010 eliminando l'artículu 5.1 de la Resolución de 2008. Tamién se sacó en BOPA la Resolución de 26 de xunetu de 2012 modificando la resolución de 2008 y estableciendo una redacción nueva pal artículu 5.1 qu'impón el requisitu de 8 alumnos/es solo a les asignatures de Segunda Llingua Estranxera y Cultura Clásica.
Estes resoluciones de la Conseyería tendríen que significar la desapaición definitiva de la ratio mínima d'alumnos/es pa los estudios de Llingua Asturiana y la consolidación del derechu de toles persones a cursar los mentaos estudios ensin negún tipu de torga o disculpa. Pero pa qu'esto se cumpla a lo último, la Xunta recuerda que "va necesitase la tresmisión efectiva d'esta información, per parte de la Conseyería, a tolos centros educativos d'Asturies. Pa ello ha de remarcase esti aspectu na Circular de principiu del cursu y monitorizar tol procesu de matriculación".
