UVIÉU, 3 de Setiembre (EUROPA PRESS) -
La Xunta Pola Defensa de la Llingua Asturiana espera que la Comisión Especial sobre la Llingua Asturiana que s'entamará na Xunta Xeneral tenga "dalguna capacidá de decisión". Na so opinión, esti órganu llega 30 años tarde, porque debió echase a andar en 1982, y agora tendría más sen como Conseyu Asesor del Gobiernu autonómicu.
Nuna nota prensa, la Xunta dexa claro qu'aplaude "toles iniciatives parllamentaries que busquen reconocer el nuestru patrimoniu llingüísticu". "Sicasí, pensamos qu'esta comisión llega décades tarde. Tenía más sentíu entamala nel añu 1982, cuando l'autonomía echó a andar, o en 1998, namás aprobase la Llei d'Usu. Y ye que preguntase cómo se pue protexer o potenciar l'idioma nel añu 2015 -ensin esclariar si depués se va llevar alantre lo alcordao- nun tien munchu xacíu, cuando toos sabemos que l'aniciu de too ello tien que venir d'una reforma del Estatutu que recueya la oficialidá. Lo contrario ye poner estorbos al procesu de recuperación llingüística y a una reivindicación social que lleva na cai más de tres décades reclamándolo", comenta la Xunta.
Amás, según la organización, "esta comisión d'estudiu nun va ser permanente y nun va tener capacidá llexislativa. Tamién se vuelve a les palabres de "protección" y "potenciación", dando un pasu atrás na "normalización" que la FSA parecía qu'empezaba a asumir (obligada) col cambéu na denominación de la Dirección Xeneral encargada de les cuestiones llingüístiques".
"Esperamos que la comisión acabe convirtiéndose nun Conseyu qu'asesore al Parllamentu y al Gobiernu y que tenga dalguna capacidá de decisión o pesu nes midíes qu'hai que tomar pa normalizar l'usu del asturianu na nuestra sociedá", señalen.
