UVIÉU, 5 de Xunu (EUROPA PRESS)
La Xunta Pola Defensa de la LLingua Asturiana recordó esti vienres a los partíos políticos que tiene una "oportunidá perfecta" pa demostrar el respetu a la llegalidá y a la llingua asturiana, de cara a establecer les sos exixencias pa llegar a cuerdos na investidura del presidente autonómicu.
Nuna nota de prensa, la organización criticó "la demoledora" llexislatura qu'acabó y pidió a los partíos políticos nesta nueva etapa de negociación que muestren "el so compromisu faciendo valir nos sos pactos, aliances y esixencies, de manera inescusable y irrenunciable, el respetu a la igualdá de la ciudadanía que la oficialidá supón". "Tola xente, sobre manera, lo que nagua pola resolución d'esta llarga deficiencia democrática, va tar pendiente y tomar nota de lo que se dixo y se diz, de lo que se llucha y se defende", señaló la Xunta.
Sobre la lexislatura acabada, denunció l"'enllancamientu avezáu de la escasa actividá del departamentu encargáu de la supuesta "política llingüística" asturiana", y faló "d'un retrocesu claru". "Non solo na visibilización y espardimientu de la llingua sinón, mesmamente, n'ámbitos que, como l'educativu, el mediáticu y el de la toponimia, taben na marxinación y precariedá permanente y qu'agora, depués d'años de desidia malintencionada y incompetencia proverbial, tán peor: nun tris de que'l asturianu desapareza d'ellos", apuntó la organización.
La Xunta cree que "esto nun pue siguir asina". "Que se siga pasu a pasu l'axenda oculta de la clas dirixente que nes últimes décades vien faciendo tolo posible por facer desaparecer la llingua asturiana como vehículu de comunicación contemporaneu y dexala reducida a una curiosidá de muséu. Vamos denunciar constantemente a los culpables y instigadores d'esti procesu, y vamos señalar ensin duldar a los enemigos d'un futuru dignu y con derechos pa les persones que falen asturianu", acabó la nota.
