UVIÉU, 17 Nov. (EUROPA PRESS) -
Ente 159 propuestes de resolución presentaes polos partíos políticos pa ser debatíes na xornada final del Debate d'Orientación Política namás una fala de la llingua asturiana. Ye una propuesta del PP na que se pide que la Xunta Xeneral inste al Conseyu de Gobiernu a refugar la oficialidá.
La propuesta, a la que tuvo accesu Europa Press, ta firmada pola portavoz del PP, Mercedes Fernández, y va ser debatida y votada güei, na tercer y última xornada del Debate d'Orientación Política, xunto a les otres 159 propuestes presentaes polos seis grupos parllamentarios representaos na Xunta Xeneral.
Según informaron dende la Xunta Xeneral, depués d'un primer turnu pa que los Grupos Parllamentarios defendan les sos propuestes por nun más de 30 minutos caún, va abrise un segundu turnu, nel que cada Grupu Parllamentariu, por espaciu de 20 minutos, va fixar posición sobre les propuestes de resolución de los demás. La votación de les propuestes de resolución va facese por orde de presentación nel Rexistru de la Cámara.
El grupo parllamentariu socialista presentó 26 propuestes, los 'populares' 32, Podemos Asturies 25, la mesma cantidá qu'IU-IX y Foru Asturies, mentes que Ciudadanos rexistró 26 propuestes.
El plazu pa presentar propuestes de resolución finalizaba esti miércoles a les 19.00 hores. Agora, les propuestes van ser votaes en una sesión plenaria nueva, esti vienres, na que los diferentes grupos van defender les sos iniciatives.
