UVIÉU, 6 Feb. (EUROPA PRESS) -
La Comisión d'Educación y Cultura de la Xunta Xeneral va votar na so xunta próxima, previsiblemente nun mes, sobre l'incumplimientu na ellaboración d'un Plan de Dignificación del Asturianu. El plan tendría qu'ellaboralo'l Gobiernu autonómicu como aprobó'l Plenu de la Cámara n'ochobre del 2015 colos votos de PSOE, Podemos Asturies, IX y Foru.
La votación sobre'l so incumplimientu propúnxola esti martes na Comisión d'Educación y Cultura la diputada d'IX Concha Masa, polo que la mesma va formar parte del orde del día de la xunta próxima y va tener que sometese a la votación de los distintos grupos.
Nun ye la primer vez que la Comisión trata sobre la redacción d'esti Plan. Asina, yá se pidiera información al Executivu autonómicu sobre la so tramitación n'abril y n'ochobre del añu pasáu. Na primer ocasión, la información nun entró nel rexistru de la Cámara, mentes que depués de la solicitú d'ochobre, el Gobiernu rexistró na Cámara la información el 27 de payares.
Al recibir respuesta, Concha Masa solicitó que se lleve a incumplimientos, polo que la Comisión va tener que determinar si s'incumplió la Resolución 20/X, de 16 d'ochobre de 2015, adoptada pol Plenu de la Xunta Xeneral, sobro presentación d'un Plan de Dignificación de la Llingua Asturiana.
La redacción d'un Plan alcordóse'l 16 d'ochobre del 2015 na Xunta Xeneral colos votos a favor de PSOE, Podemos Asturies, IX y Foru Asturies, mentes que'l PP votó en contra y Ciudadanos astúvose.
El documentu encamentaba al Conseyu de Gobiernu a aprobar, enantes del final del periodu de sesiones próximu, un plan de dignificación y normalización de la llingua asturiana que contenga un conxuntu d'acciones urxentes p'algamar la so dignificación sociollingüística, la so protección y la so promoción.
