UVIÉU, 24 de Marzu (EUROPA PRESS)
El mozu youtuberu Wilson Alfonso, de 24 años, que nos últimos díes subió dellos videos nos que besaba a moces peles cais d'Uviéu ensin el so consentimientu cola escusa d'un trucu de maxa, resultó condenáu esti vienres, en reconociendo los fechos, al pagu de 1.890 euros de multa y tendrá qu'abonar a dos de les victimas una indemnización 500 euros, a caúna. Una tercera chica renunció al desquite.
Amás, acordóse la confiscación del ordenador del acusáu, la tarxeta gráfica y la cámara cola que grabó los vídeos.
Asina lo decidió esti vienres el Xulgáu d'Instrucción númberu 4 d'Uviéu nel que se celebró un xuiciu rápidu y l'acusáu reconoció los fechos y mostróse arrepentíu. El mozu youtuberu enfrentábase a cuatro denuncies por abusu sexual, trés consumaes y una en tentativa al nun llegar a besar a la moza.
La lletrada de Wilson Álfonso, Sonia de la Paz Fernández Álvarez, manifestó a la salida del xuiciu que'l so cliente yá zarró les sos cuentes de les sos redes sociales y dixo que ta bien arrepentíu. "Lo que yera una broma pa él ye un delitu pal restu de les persones".
A les puertes de los xulgaos manifestáronse dellos colectivos feministes que portaben pancartes con lemes como 'Fuera acosadores de les nueses cais' o 'Abusón, a les nueses fíes nin te arrimes'.
El mozu en rematando'l xuiciu salió pela puerta del Xulgáu de Guardia intentando burlar la presencia de los medios de comunicación y de les manifestantes pero nun lo llogró a lo último y persiguiéronlu hasta una parada de taxis cercana a los xulgaos. Una vez ellí dalguna de les manifestantes llegó a golpiar en más d'una ocasión el vehículu nel que se metió l'acusáu.
