Zapatero diz que la so política pro Derechos Humanos ye "coherente" en Cuba

EP

MADRID, 9 de Marzu (EUROPA PRESS)

El presidente del Gobiernu, José Luis Rodríguez Zapatero, defendió esti martes que la so política de Derechos Humanos ye "coherente y eficaz" y entiende qu'asina lo demostró oponiéndose "a guerres ilexítimes" como la d'Iraq y ayudando al zarru de Guantánamo. Zapatero calcó en que la so política tamién ye "eficaz" en Cuba, frente a la "retórica", "sacar pechu", y el "partidismi" colos Derechos Humanos que, al so xuiciu, practica'l PP.

Zapatero protagonizó un duru enfrentamientu col voceru del PP nel Senáu, Pío García-Escudero --el presidente del Senáu, Javier Rojo, tuvo que llamar al orde una docena de veces-- que lu acusó de "complacencia" con "dictadures como Cuba y Venezuela" y calificó de "vergonzosu", "indignante" y "infamante" el comportamientu del Gobiernu tres l'autu de l'Audiencia Nacional qu'apunta supuestos nicios de collaboración de Caracas con ETA y les FARC.

García-Escudero contó qu'a Zapatero, "tamién en política esterior, la so ideoloxía núbla-y l'entendimientu" y acusólu de dar "una imaxe acomplexada y humillante" en política esterior.

El xefe del Executivu, sicasí, echó-y en cara que los 'populares' "nunca salen en defensa del Gobiernu cuando recibe ataques del estranxeru", al contrario de como fai él cada vez que s'ataca al ex presidente José María Aznar y como fizo cuando yera xefe de la oposición. "Pónganse del llau del Gobiernu en cuestiones trascendentes de política esterior y de llucha contra ETA, casi nunca lo faen, pónganse al llau del Gobiernu alguna vez", afaló Zapateru.