Zelaya denuncia al Estáu hondureñu pol golpe

   L'ex presidente hondureñu Manuel Zelaya, derrocáu nun golpe d'Estáu'l pasáu 28 de xunu, presentó una demanda contra l'Estáu del so país ante la Corte Interamericana de Derechos Humanos (CIDH), según informa esti martes la prensa llocal, que precisa que'l Gobiernu yá anunció que se va defender d'esta demanda.

   La defensa hondureña va coordinase dende la Procuraduría Xeneral del Estáu y les acciones de defensa van realizase de forma coordinada y interinstitucional ente los distintos poderes del Estáu y instancies independentes.

   Según informa esti martes el diariu 'El Heraldo', Zelaya presentó la demanda a primeros de febreru, en autorizándo-y el presidente hondureñu, Porfirio Lobo, la so salida del país hacia República Dominicana. Na demanda, según esti diariu, solicita que na sentencia "ordene'l restablecimientu de la democracia, al traviés de la convocatoria de l'Asamblea Nacional Constituyente".

   Sicasí, según l'ex presidente de la Corte Interamericana de Xusticia, Rigoberto Espinal, "la denuncia ye improcedente dafechu". Según Espinal, nestos casos impera el derechu internu y la CIDH nun pue ordenar la instalación d'una constituyente n'Hondures.

   Coles mesmes, según el diariu, Zelaya y los sos ex ministros tamién pidieron la suspensión inmediata de la execución de les ordes de captura na so contra, hasta que la CIDH esaminare'l casu. Amás, solicitaron midíes provisionales a favor del ex presidente, familiares y ex ministros, per parte de la Corte Suprema de Xusticia d'Hondures.

   Según la fiscal de los Derechos Humanos, Sandra Ponce, la CIDH tendrá d'analizar el casu pa determinar darréu si-y da cursu o lo unvía a la Organización d'Estaos Americanos (OEA), si lu considera políticu.