MADRID, 29 de Xunetu (EUROPA PRESS)
El Conseyu de Política Fiscal y Financiera (CPFF) acordó que toles comunidaes reduzan el so déficit al 0,3% del PIB l'añu qu'entra, tal como quería'l Ministeriu de Facienda, y non que caúna disponga d'un marxe distintu como pretendíen dellos conseyeros.
Namás Facienda, que tien mayoría cualificada nel CPFF, y les comunidaes gobernaes pol Partíu Popular (Castiella y Lleón, Murcia, Madrid, La Rioxa y Galicia) votaron a favor del repartu simétricu del déficit pal añu qu'entra, amás de les ciudaes autónomes. El restu votaron en contra.
Ello ye que munchos conseyeros aprovecharon la xunta pa pidir al Gobiernu que separe'l marxe del 0,3% ente les comunidaes en función de les necesidaes de caúna, apoyándose nel informe de l'Autoridá Independiente de Responsabilidá Fiscal (AIReF), que tamién defende un repartu estremáu del déficit.
Sicasí, Facienda yá dixera que nun volvería facer un repartu asimétricu como nel 2013. Nesta mesma llinia manifestáronse dellos conseyeros del PP, qu'esplicaron que tán en contra de los déficit "a la carta" porque demostraron ser un fracasu" va dos años.
Pa los años 2017 y 2018, el CPFF tamién pactó oxetivos individuales simétricos de déficit pa toles rexones, que van tener que baxar el so saldu negativu del 0,3% al 0,1% nun añu y llegar al equilibriu en 2018.
