Javier Fernández.
EUROPA PRESS
Actualizado: viernes, 26 mayo 2017 18:56


UVIÉU, 26 de Mayu (EUROPA PRESS)

El presidente del Gobiernu asturianu y tovía secretariu xeneral de la Federación Socialista Asturiana (FSA), Javier Fernández, esplicó esti vienres que yá tomara la decisión de nun presentase a la reelección a lo más responsable del partíu y que la victoria de Pedro Sánchez nes primaries del PSOE "ratificólu nesa idea". Asina, reclamó "sintonía" y relación "fluyida" al so socesor hacia l'Executivu autonómicu, que sí va siguir presidiendo hasta'l fin del so mandatu, nel 2019.

Fernández ofreció esti vienres una rueda de prenses posterior a la xunta de la Comisión Executiva de la FSA, na qu'informó de la so decisión de nun siguir al mandu de la formación socialista autonómica, que va celebrar el so congresu en setiembre.

Aseguró que la decisión yá la tenía tomada. Poro, los resultaos nes primaries del PSOE, que ganó Pedro Sánchez (él apoyara activamente a Susana Díaz) lo único que ficieron ye "ratificame nesta idea".

El presidente autonómicu reconoció qu'existe una "evidente división" nel partíu, tanto n'España como n'Asturies, y que "ye oportuno que seya otru home o otra muyer" quien se ponga al frente de la federación pa consiguir "esa concordia que toos deseamos".

En tou casu, dexó bien claro que va siguir siendo presidente del Gobiernu asturianu. Van volver poro a nun coincidir el secretariu xeneral de la FSA, tres el congresu de setiembre, y el presidente del Gobiernu autonómicu, enclín que siempre siguieren los socialistes y qu'él rompió. Nesti sen, a la futura directiva pidió que "tenga una relación fluyida" col so Gobiernu.

Asina, recordó los sos años de convivencia como secretariu xeneral con Vicente Álvarez Areces como presidente del Principáu. "Había acuerdu, sintonía y negociación fluyida", esplicó. El presidente espera recibir esi mesmu tratu de la FSA, "agora que voi tar na situación inversa", comentó.

Según Fernández, "17 años son munchos años". Llegó a la secretaría xeneral de la FSA nel añu 2000, "nun momentu bien difícil, con fondes divisiones", recordó. "Consiguimos salvar el partíu", aprofió. Ello ye que señaló que nel so día, na primer ocasión na que se presentó ganó por una corta diferencia, y nes otres convocatories consiguió "importantes mayoríes".

PIDIR PERDÓN

Preguntáron-y poles declaraciones de la diputada asturiana nel Congresu Adriana Lastra, bien implicada a favor de la candidatura de Pedro Sánchez, quien considera que dellos barones del PSOE tendríen de pidir disculpes tres los resultaos de les primaries. "Yo pido perdón por equivocame, non por perder", caltuvo Fernández. Recordó que "mientres estos 17 años delles veces gané y a los que perdieron nun-y esixí que pidieren perdón, namás que s'integraren".

Descartó que se sienta lliberáu por dexar la secretaría xeneral de la FSA, que namás se siente "responsable". Dalgún día "tien que terminar y eso ye bueno pa la organización", consideró.

Más noticias

Leer más acerca de: