Foto: EUROPA PRESS/FORO ASTURIAS
UVIÉU, 22 de Febreru (EUROPA PRESS)
El vicepresidente segundu de la Diputación Permanente de la Xunta Xeneral d'Asturies, Pelayo Roces (Foru), dixo esti miércoles que si la oposición refuga la llei d'endeudamientu plantegada pol Gobiernu de Francisco Álvarez-Cascos, nun se va limitar a castigar al Gobiernu, sinón que va tar "castigando a tolos asturianos".
Roces fizo estes manifestaciones, a preguntes de los periodistes, dempués de que la Mesa de la Diputación Permanente de la Xunta Xeneral d'Asturies acordara pidir al Gobiernu más información sobre'l proyectu de llei d'endeudamientu que l'Executivu autonómicu quier que se tramite nel Parlamentu asturianu.
"Esperamos que nun seya una maniobra dilatoria", dixo la secretaria segunda de la Mesa, Cristina Coto, qu'insistió na "urxencia" y la "necesidá" d'aprobar el proyectu pa que'l Gobiernu puea recurrir a la deuda. Argumentó que l'actual escenariu de prórroga presupuestaria nun permite recurrir al endeudamientu, y, poro, nun pue facese faese frente a les inversiones comprometíes pol anterior Gobiernu de signu socialista.
Ésa ye la razón de que l'Executivu pida esi recursu a la deuda. Insistió en que los mayores afectaos son los asturianos que nun van poder cobrar en proyectos como'l del nuevu Hospital Universitariu Central d'Asturies.
Sobre l'informe del lletráu mayor de la Xunta, Alberto Arce, que considera non adecuao que la Diputación Permanente apruebe la llei, Cristina Coto dixo que "nun ye vinculante". Esplicó qu'ésta "nun ye una cuestión xurídica", sinón "una decisión política".