UVIÉU, 9 de Febreru (EUROPA PRESS)
Cuatro nuevos llenizos punxeron en marcha un nuevu grupu musical, La Nueve, que funde'l folk y la música popular asturiana, buscando crear nuevos soníos que conviden al baille y cultivando la variedá llingüística de la zona de L.lena.
Los integrantes son David Suárez 'Cai' (flautes), Luis Moro (curdiones), Abel García (guitarra y voz), David Tuñón (baxu) y Adrián González 'Lobo' (bodrhan y voz). El grupu va empezar la so andadura con un conciertu d'estrenu'l próximu sábadu, 20 de febreru, de magar les 20.00 hores, na sede de l'asociación cultural Serondaya de Cenera (Mieres).
El grupu señala nuna nota de prensa promocional que "surde como respuesta natural a la necesidá creativa d'un grupu comprometíu cola revalorización y reivindicación de la cultura popular asturiana".
Fundáu en La Pola L.lena n'agostu del 2015, los componentes del La Nueve provienen de formaciones cercanes a otros estilos como La Col.lá Propinde, Fala non caduca y Mokomitas.
Les sos composiciones transiten ente emociones y espresiones musicales de la tradición oral del conceyu de L.lena y d'otros llugares de la xeografía asturiana, con un enfoque propiu que busca atrayer al públicu a soníos acústicos que conviden al baille.
Anque la llinia del grupu ye principalmente instrumental, guarden nes sos lletres un especial cuidáu por caltener la variante linguística de la zona rural de L.lena. El pesu de la melodía y de la percusión llévala la flauta trevesera de madera, l'acordión diatónicu y el bodrhan, mientres que l'harmonía recái na guitarra y el baxu.
Nel so repertoriu inclúin materiales recoyíos n'estudios etnográficos y cancioneros populares de la tradición asturiana arriqueciéndolos con composiciones propies y otres sonoridaes.
