Adolfo Morais Ezkerro da EHUko Donostiako Unibertsitate Eskola Politeknikoko zuzendari berria

EHU

DONOSTIA 20 May. (EUROPA PRESS) -

Adolfo Morais Ezkerro (Gasteiz, 1965) Euskal Herriko Unibertsitateko (EHU) Donostiako Unibertsitate Eskola Politeknikoko zuzendari hautatu dute, eta, hala, Carlos Ochoa Laburu orain arteko zuzendariaren kargua hartuko du. Zientzietan lizentziaduna eta doktorea da Morais EHUn.

EHUko iturriek jakinarazi dutenez, bere ibilbide profesionalean, EHUko Unibertsitate Eskola Politeknikoarekin lotura izan du 1989an Matematika Aplikatuko Sailean irakasle lanetan hasi zenetik. Bestalde, irakaskuntzan eta ikerkuntzan, industria ingeniaritzaren eta obra publiko eta zibilen arloko prestakuntzan aritu izan da, eta eskolak ematen ditu Garraio Sistemen Masterrean eta Irakasleak Prestatzeko Masterrean.

Horrez gain, ikertzaile gisa Hezkuntza Matematikoari eta Irakaskuntza Berrikuntzari lotutako gaietan aritzen da. Kudeaketari dagokionez, berriz, aipatutako unibertsitate eskolako idazkari akademiko eta zuzendariorde karguak bete ditu 1994. urtetik. Halaber, EHUko Nazioarteko Harremanetarako zuzendari eta Eusko Jaurlaritzako Meteorologia eta Klimatologia zuzendari nagusia ere izan da. Zuzendari berria eleaniztuna da, euskaraz, gaztelaniaz eta ingelesez hitz egiten baitaki.

Eginkizunak betetze aldera, zuzendari berriak erantzukizuna zuzendaritza talde honekin partekatuko du: David Esteban, Akademi Antolakuntza eta Laborategietako zuzendariorde gisa; Puy Arruti, Industria Ingeniaritzaren Arloko zuzendariorde gisa; Maialen Sagarna, Eraikuntzako Ingeniaritza Arloko zuzendariordea izango da; Mari Carmen Gratal, Kanpo Harremanetarako zuzendariordea; José Ignacio Barragués, Irakaskuntza eta Ikaskuntza Kalitateko zuzendariordea; eta Joxean Oriozabala euskara eta idazkari akademikoa.

Zuzendaritza talde berriaren xedea, funtsean, gradu eta graduondokoen eskaintza finkatzea izango da, industria ingeniaritza eta eraikuntzako ingeniaritzen arloetan. Kanpo harremanak landuko dira enpresekin, enteekin, eragileekin eta erakundeekin, I+G+b bultzatzeko eta lankidetza hitzarmenak ezartzeko, ikasleek proiektuak eta praktikak egin ditzaten.

Garrantzi handia emango zaie, bereziki, ikastegia nazioartekotzeko prozesuari eta euskarari, eta apustu tinkoa egingo da irakaskuntza eta ikaskuntza kalitatearen alde gradu zein graduondokoetan, baita hezkuntza arloan berrikuntzari lotutako alderdien alde ere. Ikasle gehiago eta hobeto laneratu ahal izateko jarduteko ildoak finkatzea izango da funtsezko beste helburuetako bat.