BILBO, 7 Abr. (EUROPA PRESS) -
Bilboko BBK Aretoak "Santo" antzerki-muntaia eskainiko du bihar eta larunbatean, 20:00etan hasita, Arriaga Antzokiak eta BBK-k martxan jarritako "Hurbiltasun Antzokia" egitarauaren baitan. Ernesto Caballeroren zuzendaritzapean, Aitana Sanchez-Gijón, Jose Luis Esteban, Esther Acevedo eta Borja Luna dira obraren aktoreak. "Santo" antzezlanaren egileak Ignacio Garcia May, Ignacio del Moral eta Ernesto Caballero bera dira.
Antolatzaileek adierazi dutenez, "Santo" proiektuaren sorburua zenbait antzerkigile elkartzeko asmoa izan zen, ikuskizun berberean gai komun bat lantzeko: santutasuna.
Horrela, Ignacio del Moralek santu garaikideei buruz hitz egin nahi zuen, itxuraz jainkorik ez dagoen leku urrun horietan egiten duten eskaintza anonimoari buruz; Ernesto Caballero Edith Stein-ek erakarrita sentitzen zen: Santa Teresa Benedikta Guretzekoa izenez ezagunagoa, emakume judutar bat izan zen, Europako zaindaria, katoliko bihurtu eta kontzentrazio-zelai batean hil zena; Ignacio Garcia Mayren kontakizunaren inspirazio-iturria, berriz, erlikien munduak sortutako obsesioak izan ziren.
Triptiko erlijioso bitxi honen hari gidaria santu bat da, tentazioaren indarrez hiru piezetako gizonezko hiru pertsonaia bilakatuko dena. Ongia eta gaizkia, txanpon beraren bi aurpegiak, pertsonaia proteiko eta forma anitzekoan haragiztatutako santu-deabrua, oholtzaren gainetik hegaldatuko dena, monje beatifiko baten pentsamenduetan infiltratutako aingeru erori baten hatsa dirudielarik.
"Santo" ikusteko sarrerak Arriaga Antzokiko eta BBK Aretoko leihatiletan eta webguneetan, 944 310 310 telefonoan eta BBKren orotarako kutxazainetan daude salgai, 14 eta 18 euroko prezioetan.
