BILBO, 30 (EUROPA PRESS)
Ertzaintzak Iberiar Penintsulan eta Europako zenbait herrialdetan estupefazienteekin trafikatzen zuen talde bat desegin du. Operazioan lau taldekide atxilotu eta droga eta garraiatzeko erabiltzen zituzten baliabideak konfiskatu ditu. Gainera, Ertzaintzako agenteek taldearen hainbat lokal ikuskatu dituzte Euskadin eta Andaluzian.
Eusko Jaurlaritzako Segurtasun Sailak jakinarazi duenez, Ertzaintzak 2014ko amaieran abiarazi zuen ikerketa, estupefazienteak jasotzen eta Penintsulan eta Europan banatzen zuen talde baten berri izan zuenean. Droga Andaluziako hirietan hartzen zuten, Malagan, Sevillan eta Cadizen kasu, eta delitu aurrekariak dituen Gasteizko biztanle batek -gizonezkoa bera- Europako iparraldeko herrialdeetan banatzen zuen. Hari buruz egin zituzten lehen ikerketak.
Gasteizko epaitegiaren agindu batekin, ertzainak Malagara joan ziren ikerketekin jarraitzera. Han, droga trafikoagatik delitu aurrekariak dituen beste batekin ikusi zuten Gasteizko gizona, beste batengana joaten. Hirugarren pertsona horrek substantzia estupefazienteak ematen zizkien, eta atoi baten hondo bikoitzean ezkutatzen zituzten. Andaluzian, ertzainak Guardia Zibilarekin lankidetzan aritu ziren.
Azkenean, joan den asteko ostegunean, Andaluziatik zetozela, ertzainek bi gizonezko atxilotu zituzten Armiñonen (Araba); bidaian erabili zuten ibilgailuak lotuta zuen atoian purutasun handiko 25 kilo marihuana kukulu zeuden ezkutatuta. Taldeko beste kide bat -emakumezkoa- Gasteizen atxilotu zuten gero; atzerriko nazionalitateko beste gizonezko bat, berriz, Malagan atxilotu zuten. Atxilotu guztiak 40 eta 65 urte artekoak dira. Euskadin atxilotutako lagunetako bat dagoeneko espetxeratu dute.
Konfiskatutako drogaz gain (100.000 euroko balioa zuten, bost aldiz ere handiagoa amaierako helburuan), 10.000 euro eskudirutan, hiru ibilgailu, droga ezkutatzeko sistemak dituzten bi atoi, zehaztasun baskulak, ontziratzeko eta zigilatzeko makinak, hainbat telefono mugikor, substantziak manipulatzeko eta ontziratzeko tresnak, ibilgailuetan eta atoietan zuloak egiteko tresnak (miatutako ustiategian aurkitu zituzten) eta delituarekin lotutako askotariko dokumentuak konfiskatu zituzten.
ERREGISTROAK
Atxiloketen ondoren, ertzainek hainbat erregistro egin zituzten. Alde batetik, Arangizko baserri bat erregistratu zuten, droga garraiatzeko ibilgailuak eta atoiak gordetzeko erabiltzen baitzuten; bestetik, Gasteizko etxebizitza bat miatu zuten, droga gordetzeko erabiltzen zutelako; gainera, Malagako familia bakarreko bi etxebizitza ere erregistratu zituzten.
Gaizkile taldeak bi urteko ibilbidea zuen. Hilean bitan garraiatzen zuten droga; urtean, tona erdi inguru guztira, hau da, bi milioi eurotik gora balio duen kantitatea. Taldea desegitean, gainera, Ertzaintzak trafikatzaileen beste helburu bat betetzea galarazi dute: izan ere, Bartzelonan droga biltegiratu eta Europara eramateko beste bide bat zabaldu nahi zuten. Horretarako, Bartzelonako garaje bat alokatu zuten jada, droga Europara eramateko gunea izan zedin eta atzerriko trafikatzaileekin ere harremanak izan zituzten.
Ildo horri jarraiki, eta Europolen bidez, Ertzaintzako ikerketek jarraipena izan dezakete Europako beste herrialde batzuetan, talde horretako kide gehiago identifikatu daitezen eta horiek justiziaren aurrera eraman daitezen.
