av2" class="NormalTextoNoticia" itemprop="articleBody">
BILBO, 16 (EUROPA PRESS)
Bilboko Udalak eta Europako Kontseiluak aniztasunaren kudeaketako erronkei buruzko eztabaida politiko bat eta "Hizkuntza aniztasuna kultur arteko hirientzako aktibo gisa" izenburuko mintegia antolatu dituzte asteazkenetik ostiralera bitartean, AlhondigaBilbaoko Bastida Aretoan. Ekimenen xedea hirien hizkuntza aniztasunaren abantailak eta horietaz baliatzeko moduak aztertzea da, garapen ekonomiko, sozial eta kulturalari begira.
Europako Kontseiluak Bilbo aukeratu zuen jarduera hauek egiteko sare honetan egiten duen lanarengatik eta hizkuntza alorreko bere testuinguruarengatik, Bilboko Udaleko iturriek jakinarazi dutenez.
Mintegia Intercultural Cities europar programaren barruan dago eta Europako Kontseiluak eta Europako Batzordeak sustatzen dute. Bere xedea kultur arteko harremanak sustatzearekin konpromisoa duten hirien sarea sortzea da, aniztasun eta integrazioari buruzko ideia eta praktika berriak sustatuta eta hirien artean elkar ezagutzea eta trukatzea ahalbidetuta.
Mintegia asteazkenean, irailaren 17an, hasiko da, Bastida aretoan, eta joera politiko desberdineko 12 bat udal ordezkarik parte hartuko dute. Lehenengo hitzordu honetan, hiriek aniztasunaren kudeaketan dituzten erronkei buruzko hainbat gai aztertu eta eztabaidatuko dira, kasu arrakastatsuak eta tokiko eremuko giltzarrizko gaiak arakatuz.
Halaber, ostiralera arte, 30 bat nazioarteko aditu eta Intercultural Cities sareko kide izango dira Bilbon. Jarraitu beharreko pausoak bereizteko eta, toki garapenaren aurrean hizkuntza aniztasunaren potentzialaz ahal den beste baliatu ahal izateko xedea izango dute.
Hizkuntzak eta kultur ondarea, hiria, hizkuntza eta ekonomia, eta hirietako hizkuntza trukea izango dira aztertuko diren gaietako batzuk, besteak beste. Dublin, Londres, Berlin, Oslo edo Lisboa bezalako hiriak dira sarean modu aktiboan parte hartzen duten hirietariko batzuk. Bertan, gai hauei buruzko esperientziak eta ezaguerak partekatzen dituzte.
