GASTEIZ, 9 (EUROPA PRESS)
Arabako Diputazioak 7,2 milioi euro inbertituko ditu 2016. urtean errepideen foru sarea osoa zaintzeko eta hobetzeko, sarearen 1.500 kilometroetan zorua, seinaleztapena eta segurtasuna hobetuz, besteak beste. Aurrekontu hori handitu egingo da ekitaldian zehar, beste programa eta jardun osagarri batzuen bitartez, Ramiro Gonzalez ahaldun nagusiak iragarri duenez.
Diputatuen Kontseiluak asteazken honetan erabaki du Api Movilidad, Firmes Alaveses y Estevez Conductos Subterráneos enpresen aldi baterako batasunarekin errepideen foru sarearen mendebaldeko zonalde zaintzeko sinaturiko kontratua, 3,6 milioi euroko aurrekontua duena. Halaber, duela astebete gauza bera erabaki zuen ekialdeko zonaldeko kontratuari buruz, Señalizaciones Villar y Yarritu aldi baterako enpresen batasunari esleitu zitzaiona zenbateko berberarekin.
Bi kontratu horiek luzatzen diren bigarren eta azken aldia da, Bide Azpiegituren eta Mugikortasunaren Sailak eguneratu egingo baititu datorren urtean, lizitazio eta esleipen prozesu berri baten bitartez.
Modu honetan, Bide Azpiegituren eta Mugikortasunaren Sailak beste 7,2 milioi euro inbertituko ditu 2016an Arabako errepideak zaintzen. Baliabide horiek erabiliko dira sareko zainketa eta arreta zerbitzuak egoki finantzatzeko, errepideak zaintzeko, seinaleak edo segurtasun hesiak berriz jartzeko edo bidezoruak berritzeko.
Zehazki, aurrekontuko hiru eurotik ia bat zainketa zerbitzuetarako, larrialdietako arreta zerbitzuetarako eta bideak zaintzeko ohiko lanetarako erabiliko da. Halaber, 1,5 milioi euro baino gehiago erabiliko dira foru errepideen sareko 1.500 kilometroetan belarrak moztu, sasiak kendu eta inausketa lanak egiteko. Antzeko kopurua erabiliko da seinale eta hesi kaltetu edo narriatuak konpondu eta ordezteko eta halakorik ez zegoen lekuetan berriak jartzeko, zirkulazioaren segurtasuna hobetzearren.
Bestalde, aldi baterako enpresen batasunek honako lan hauek gauzatu beharko dituzte kontratu horien barruan: neguan errepideak elur eta izotzetatik garbitzeko lanak (430.000 euro baino gehiago) eta zoladurak konpondu eta bide zoruak tratatzeko lanak (800.000 euro baino gehiago). Kopuru horiekin batera, badira beste batzuk ere, eskulanari, makineriari eta gidaririk gabeko ibilgailuei eta egiturei eta hargin lanei dagozkienak.
