GASTEIZ, 30 (EUROPA PRESS)
Arabako Foru Aldundiak hondakin organikoak bereiztea eta kudeatzea sustatuko du lurralde historiko osoan, konpostajea bultzatuz eta bosgarren edukiontzia ezarriz. "Ekonomia zirkularraren lekuko ona da. Kostu ekonomikoa aurreratuko dugu, baina, batez ere, ingurumen kostua", Josean Galera Ingurumen eta Hirigintza Saileko diputatuak azpimarratu duenez.
Arabako Aldundiak hilabeteak eman ditu zatiki organikoa birziklatzearen inguruko azterlan bat jorratzen lurraldeko kuadrilla eta udalekin parte hartzearekin, eta horiek "interes eta konpromiso handia" erakutsi izana nabarmendu du Galerak.
Izan ere, gaur egun, gainerako hondakinetarako edukiontzira edo edukiontzi grisera botatako hondakinen %52 elikagai edo lorategietako hondarrak dira, hau da, bereizi egin ahal dira eta, ondoren, birziklatu eta balioa eman. "Lurraldean zor dugun eta hurrengo hilotan zuzentzen hasi nahi dugun eginkizuna da", adierazi du.
Kuadrillek eta udalek parte hartu duten prozesu baten emaitza da ostegun honetan aurkeztu den azterlana. Udalek eta kuadrillek dauden aukerak aztertu eta erakunde bakoitzarentzat egokiena dena hautatu dute. "Azterlanaren xedea da bilketa sistemaren baten bidez etxeko hondakin organikoen kudeaketa iraunkorra erdiestea. Etxeetakoa diogu horiek baitira hondakin organikoen sortzaile nagusiak, ahanzterik ez badago ere, sortzaile handiak, hala nola, elikagai saltokiak, ikastetxeak eta jatetxeak", laburbildu du.
BOSGARREN EDUKIONTZIA
Hain zuzen, bosgarren edukiontzia edo edukiontzi marroia hautatu da
etxe habitatuen %48an eta konpostajea %47an, azken hori nork bere kabuz edo eraikinaren guztikoekin batera egiteko. Etxeen %14an konpostaje komunitarioa egingo da eta %4,5ek bilketa pneumatikoa erabiliko du hondakin organikoak biltzeko.
Biltzeko era horiek etxeetan ez ezik, Arabako herrietako jatetxe, ikastetxe eta elikagai saltoki txiki eta handietan ere ezarriko dira. Zehazki, haietako gehienek "atez ateko" sistema edo "bilketa partikularra" eta edukiontzi marroia erabili ahal izango dituzte.
Bilketa sistemarekin hasteko beharrezko inbertsioak direla eta, aurreikusi da milioi bat euro ezinbesteko direla hura ezartzeko. Aukerak banaka aztertuz gero, inbertsio handiena konpostaje komunitarioak eskatzen du, ondoren, etxeko konpostajeak, bosgarren edukiontziak, inausketa hondarrak jasotzeko edukiera handiko edukiontziek, bilketa pneumatikoak eta sortzaile handietarako "atez ateko" sistemak. "Gustukoago dut inbertsio hitza gastu hitza baino, asko aurreratuko baitugu, hala dirutan nola ingurumenean, aukera horiek emanez", adierazi du.
