GASTEIZ, 11 Feb. (EUROPA PRESS) -
Arabako Ogasunaren Ikuskatze Zerbitzuak 2007. eta 2010. urteen artean guztira 228,5 milioi euroko zerga-iruzurra agertu dela jakinarazi du. Iaz, 80 milioi eurotik gora izan ziren, aurreko urtean baino 32 milioi gehiago eta 2006an berreskuratutakoen bikoitza, hain zuzen ere.
Jose Luis Cimiano Arabako Foru Aldundiko Ogasun, Finantza eta Aurrekontu Saileko diputatuak, Josu Zubiaga Ogasun zuzendariarekin batera, foru erakundeak gauzatzen ari den iruzurraren aurkako borrokaren balantzea egin du.
"Arabako Ogasunaren eraldaketa planari eta eraginkortasunari esker lau urtean Arabako zerga-iruzurraren datuak bikoiztu egin ditugu", adierazi du Cimianok. Halaber, zergadunen informazio hobea eta zabalagoa izateko, kudeaketa hobetzeko eta ordainketa borondatezko epean ahalbidetzeko egiten ari diren lana nabarmendu du.
Iazko zerga-iruzurraren azterketa xehatua eginda, Ogasuna ohartu da agertu den 80 milioi eurotik gorako kopuru horretatik, 54,7 milioi zuzeneko zergetan izan direla (5,3 milioi PFEZean, 14,8 milioi Sozietateen gaineko Zergan eta 34,5 milioi Egoiliar ez direnen Errentaren gaineko Zergan), eta gainerako 26,4 milioiak, aldiz, zeharkako zergetan (gehiena, 26 milioi, BEZean).
Ogasun, Finantza eta Aurrekontu Saileko foru diputatuak gogorarazi du Zerga Ikuskatzailetzaren ekintza zuzenez gain, iruzurraren aurka borrokatzeko nahitaezkoa dela Administrazioak tresnarik hoberenak izatea. Ildo horretatik, bi alderdi azpimarratu ditu: alde batetik, Zergadunentzako Zerbitzuen Karta berria, zergadunaren eta Ogasunaren arteko harremanak errazten dituena, eta, beste alde batetik, Zergadunen Errolda Bateratua, Arabako Ogasunak zergadun bakoitzari
buruz duen informazio guztia biltzen duena.
