BILBO, 31 Ene. (EUROPA PRESS) -
Arrigorriagako (Bizkaia) Gazteguneak "nobedadez betetako eta ohiko estereotipoetatik urrundutako" ikastaro eta tailerren programazioa osatu du 2011ko ekitaldirako. Izan ere, jarduerak generoaren arabera banatu dira, herriko alkate Alberto Ruiz de Azuak esandakoaren arabera.
Aurten, Gazteguneak badu nobedade bat, tailerrak eta ikastaroak gazteen kezketara egokitu baitira. "Egitarau anitz eta oparoa da, 16 urtetik 35 urtera bitarteko pertsonentzat egokitua. Prestatutako egitaraua konplexurik gabe aurkeztuko da aurten", adierazi du alkateak.
Arrigorriagako gazteen aisialdira eta entretenimendura bideratutako espazioak "gero eta denbora gehiago hartzen du beraien eguneroko ohituretan, eta azturetan izandako aldaketa horren ondorioz, kultura-kudeatzaileak gero eta jarduera sortzaile eta erakargarriagoak inprobisatu eta diseinatu behar dituzte", gaineratu du.
Gazteguneko teknikariek prestatutako egitarauak (matrikula egiteko epea otsailaren 7an amaitzen da) 11 ikastaro eskainiko ditu; ikastaroak Gaztegunean bertan nahiz Abusuko zentro soziokulturalean emango dira, otsailaren erdialdetik ekainaren amaierara bitartean.
"Birziklapen sortzailea" da Gaztegunean bertan emango den tailerretako batean landuko den gaia; tailerra 18:00etatik 20:00etara izango da, otsailaren 16tik ekainaren 15era bitartean.
Gaztegunean bertan "Jantzien kustomizazioa" arloari buruzko prestakuntza ere eskainiko da. Tailerra hasteko, jantziak berrikusiko dira, eta ikasleen eskura dauden materialekin aldatuko dira. Tailerrean, jantzi baten kustomizazioaren zeregin birziklatzaile eta eraldatzailea azalduko da. Tailerra otsailaren 19tik ekainaren 18ra bitartean izango da, eta helburua da bazterrean utzi ohi diren ohiko jantziak anatomia bakoitzera moldatutako jantzi berezi bihurtzea.
"Balkoi jangarria" da Gaztegunean egingo den beste ikastaro baten izenburua. Natura etxera hurbiltzeko asmoz txoko ekologiko bat lantzeko helburuarekin, ikastaroa maiatzaren 7an, 14an eta 28an eta ekainaren 4an egingo da.
"Lore-artea" delakoak xede estetiko eta dekoratiboa dauka, betiere, ikasleek beraiek bilduko dituzten lore natural eta artifizialak erabilita; "Larrugintzaren hastapenak", "Kartoizko altzariak egitea", "Paperezko artisautza" eta "Antzerkia" tailerrek osatzen dute Gaztegunearen programazioa.
ABUSUN
Abusuko zentro soziokulturalean, berriz, "Norberaren burua orraztea", "Norberaren burua makillatzea" eta "Bateria" tailerrak egingo dira; azken ikastaro hori otsailaren 17tik ekainaren 16ra bitartean izango da. Mutilei zein neskei zuzenduta, eta musika-hizkuntza eta solfeoa jakin gabe instrumentu hori jotzeko behar den teknika musikala ikasteko dago pentsatuta. Eskolak banan-banakoak dira, eta ikasleen erritmora egokitutakoak.
Gazteen arretarako zerbitzuaren ordutegia honakoa da: astelehenetik larunbatera, 11:00etatik 13:30etara eta 16:00etatik 20:00etara, Gaztegunean, eta 9:00etatik 13:00etara eta 15:00etatik 21:00etara, Abusuko zentro soziokulturalean.
