DONOSTIA, 17 (EUROPA PRESS)
Gipuzkoako Sagardogileen Elkarteko sagardotegiek "emaitza izugarriak" lortu dituzte Michiganen (AEB) egiten den Laku Handietako Nazioarteko Sagardo Lehiaketa sonatuan. Horrela, Astigarragako Bereziartua sagardotegiak Urrezko Domina lortu du, sagardo naturalaren atalean, eta Astigarragako Irigoien-Herrero sagardotegiak Zilarrezkoa.
Guztira 168 sagardotegik hartu dute parte lehiaketako zortzi atal desberdinetan, eta sagardo naturalaren atalean irabazlea izan da Bereziartua eta saritua Irigoien-Herrero, Gipuzkoako Sagardogileen Elkarteak prentsa ohar bidez jakinarazi duenez.
Elkartearen arabera, Gipuzkoako sagardotegiak ahalegin handia egiten ari dira kalitatearen alde, eta horren erakusle da Ameriketako Estatu Batuetan (AEB) lortu duten emaitza. Aurreko astean Frankfurten lortu zituzten sariak Bereziartua sagardotegiak berak eta Astarbe sagardotegiak, eta orain Michigan izan da Gipuzkoako sagardoak duen mailaren lekuko.
"Azken urteetan AEBetan sagardo kontsumoa izugarri ari da igotzen eta bertan bere lekua egin nahian dabil euskal sagardoa ere. Sagardotegiak egiten ari diren ahalegin horretan oso garrantzitsuak dira horrelako sariak, sektoreari animoak emateaz gain, bertako kontsumitzaileari ere produktuen kalitatearen eta ezaugarrien berri ematen baitie", adierazi du.
