BILBO, 23 Oct. (EUROPA PRESS) -
Bermeoko (Bizkai) Joxe Miel Barandiaran udal liburutegiak ere Liburutegiaren Nazioarteko Eguna ospatuko du ostiral honetan, urriaren 24an, eta herritar guztiak gonbidatu ditu bertara joatera eskaintzen dituen zerbitzu guztiak ezagutzeko.
Bere arduradunek azaldu dutenez, asko dira eskaintzen dituen zerbitzuak, besteak beste, mailegu zerbitzua, fonoteka, bideoteka, mikroteka eta beste hainbat zerbitzu, guztiak dohainik. Liburutegiko pertsona batek zerbitzu hauen guztien berri emango die hurbiltzen diren herritarrei.
Gainera, bazkide ez diren herritarrek argazki bat eramaten badute, egun horretan bazkide egingo zaie eta horrela mailegu zerbitzua erabiltzeko aukera izango dute, besteak beste.
"Helburua da herritarrek liburutegia ezagutzea, hau da, eskaintzen dituen zerbitzu eta aukera guztiak ezagutzea", adierazi dute. Horrela, bermeotar guztiak liburutegia ezagutzen joatera animatu dituzte.
