BILBO, 19 May. (EUROPA PRESS) -
Bilboko Udaleko Kultura eta Hezkuntza Sailak, Radio Nervion eta TeleBilbaorekin elkarlanean, hiriko betiko abestiaren musika sorkuntza bultzatzea eta jairako espirituari eta tradizioari eusteko helburuz, Bilbainada Lehiaketa antolatu aurten ere, eta 5.300 euro baino gehiago banatuko ditu saritan. Horrez gain, konposizio berriren bat Bilboko errepertorioko klasiko bilakatzeko erronka ere badu.
Parte hartu nahi duten pertsonek ekainaren 30era arte dute epea egungo Bilbori edo itsasadarraren inguruko udalerriei edo bertako pertsonaiei, ohiturei eta eguneroko bizipenei buruzko jatorrizko abestiak aurkezteko. Grabazioak Radio Nervionen aurkeztu ahal izango dira, eta aurten, baita Bilboko Udaleko Kultura Sailean ere.
Edizio honetan, Bilboko Udaleko Kultura eta Hezkuntza Sailak "ahalegin handia" egin du sarien zenbatekoari eusteko. Gaztelaniazko bilbainada onenak 1.000 euro jasoko ditu, euskarazkoak beste 1.000, eta 415 euroko zortzi akzesit emango dira. Konposizioak grabazio batean aurkeztu beharko dira, eta haiekin batera letra mekanografiatua. Komenigarria da, baita ere, musika partitura aurkeztea. Lanak onartzeko eskakizun nagusia jatorrizko lanak izatea da, eta gaiak, Bilbori edo itsasadar inguruko udalerriei edo bertako pertsonaiei, ohiturei eta eguneroko bizipenei buruzkoak izango dira.
Ohikoa denez, Bilboko Udaleko Kultura eta Hezkuntza Sailak musikari profesionalek grabatutako disko bat argitaratuko du aurtengo edizioa irabazi duten abestiekin. Sariak Aste Nagusian jakinaraziko dira, eta diskoa, urte amaieran Arriaga Antzokian burutuko den galan aurkeztuko da.
