BILBO, 13 (EUROPA PRESS)
Arteshop Bilbao ekimenak bosgarren edizioa beteko du aurten, eta Bilbao Ekintza udal sozietatek 75 denda hautatu ditu, parte hartzeko interesa azaldu dutenen artean. Era berean, Euskal Herriko Unibertsitateko (EHU) Arte Ederren Fakultateko 75 ikasle aukeratu dira saltoki horietan esku hartze artistikoak egin ditzaten.
Dendek zein ikasleek bilbotarrei 75 artelan berri erakusteko interesa bateratuko dute. Erakusketa ekainaren 8tik 20ra bitartean egingo da. Lan honetarako Bilbao Arte Fundazioko hamar artisten tutoretza izango dute ikasleek, eta artistok esku hartze artistikoa egingo dute Erriberako Merkatuan edo Termibus eraikinaren turismo bulegoan.
Bilboko Udaleko Merkataritza eta Turismoko zinegotzi Marta Ajuriak, Bilbao Arte Fundazioko zuzendari Juan Zapaterrek, EHUko Bizkaiko campuseko errektoreorde Carmelo Garitaonadiak, EHUko Arte Ederren Fakultateko dekano Arantza Lauzirikak eta dekanorde Natxo Rodriguezek Arteshop Bilbao egitasmoare bosgarren edizioa aurkeztu dute.
Ekimen honekin Bilboko Udalaren helburua hiriko merkataritza jarduera bultzatzea da eta, hala, merkataritzari balio erantsia eskaintzeko. Gainera, Arte Ederren Fakultateko ikasleen esku hartze artistikoak merkataritza lokaletan jartzeari esker, lehenengoz ikus daiteke etorkizuneko artisten sormena, artearen munduan joera markatuko baitute.
Arteshop Bilbao 2015en izena emateko epea martxoaren 20ra arte egongo da zabalik. Merkataritza saltokiek Bilbao Ekintzaren Enpresa Sustapenaren Arloan (Merkataritza Saila) aurkez ditzakete eskaerak, bai eta posta elektronikoz ere, comercio@bilbaoekintza.bilbao.net helbidean. Ikasle zein artistentzat ostiral honetan bukatu da epea.
Bilbao Ekintzak diru laguntzak emango ditu esku hartze artistikoaren ekoizpen gastuen kontzeptupean. 200 euro izango dira lehiaketan parte hartzen duten Arte Ederren Fakultateko ikasleentzat eta 300 euro Bilbao Arte Fundazioko artistentzat. Gainera, proiektu garapenaren kontzeptupean, hautatutako ikasle bakoitzari 200 euro eta Bilbao Arteko artista bakoitzari 300 euro emango zaizkio.
EPAIMAHAIA ETA SARIAK
Aurkeztutako 75 proiektuetatik, egitasmoaren hiru erakunde sustatzaileetako ordezkariek (Bilbao Ekintza, EHU eta Bilbao Arte Fundazioa) hamar onenak aukeratuko dituzte, epaimahaiari lana errazteko asmoz, eta ondoren, epaimahaia arduratuko da hiru irabazleak hautatzez.
Arteshop Bilbaon parte hartuko duten dendetan aurkeztutako EHUko Arte Ederren Fakultateko ikasleen esku hartze artistiko onenetarako hiru sari zehaztu dira. Lehenengo sariari 1.200 euro, bigarrenari 900 euro eta hirugarrenari 600 euro emango zaizkie. Aldi berean, Publikoaren Sariak 450 euro emango ditu; bilbotarrek bozkatuko dute, telefonoz. Sariak ekainaren 17an emango dira, Erriberako Merkatuan.
