BILBO, 18 Jun. (EUROPA PRESS) -
Aste Nagusia iragarriko duen kartela aukeratzeko Bilboko Udalak antolatu duen lehiaketan parte hartzeko epea ostiralean bukatuko da, ekainaren 22an, eta interesaturik dauden pertsonek Jaietako Sailaren bulegoetan aurkez ditzakete euren lanak 13.00ak arte, Aznar eraikinean.
Bilboko Udalak jakinarazi duenez, aurreko edizioetan bezala, herritarrek izango dute erabakitzeko ahalmenik handiena: herritarren bozketa presentzialak %33 balioko du, eta udal web orriaren eta hedabide laguntzaileenen bidez egindako herritarren bozketak beste horrenbeste.
Beste %33 epaimahaiaren esku geratuko da. Diseinuaren arloko bost pertsonak, Bilboko Konpartsak elkarteko kide batek eta udaleko hiru kidek osatuko dute epaimahaia. Aste Nagusia iragarriko duen kartelaren egileak 3.000 euroko saria jasoko du.
Aurten, aurreneko aldiz, lehiaketaren oinarriak eguneratuta, Bilboko Udalak tradiziozko rolen eta estereotipoen orekari buruzko aipamen bat sartu du. Hain zuzen, sexua, arraza, adina, kultura eta sexu aukeragatik tratamendu gutxiesgarririk ez egoteko aipamena gehitu du.
