BILBO, 1 (EUROPA PRESS)
Bilboko 31 igogailuek 6.745.384 bidaia erregistratu zituzten 2016. urtean, eta horrek esan nahi du 20.236.152 erabiltzaile izan zituztela (batez beste, hiru pertsona igogailuak egin duen bidaia bakoitzeko), hau da, aurreko urtean baino %15,21 gehiago.
Bilboko Udalak nabarmendu du zazpi igogailu berri abian jarri izana eta horien ordutegia zabaldu izana direla erabiltzaile kopuruaren igoeraren arrazoia. Izan ere, 2016ko abenduaren 1etik, igogailuak goizeko 06:00etatik gaueko 00:00ak arte erabil daitezke. Gainera, iaz Zorrozgoiti, Arangoiti, Matiko, Luzarra, Atxuri-Jardintxikerra eta Gordoniz (bi) igogailu berriak jarri ziren martxan.
Iaz pertsona gehien eraman zituzten hamar igogailuak hauek dira, erabiltzaileen kopuruaren arabera: Artatzu, 1.245.456 erabiltzailerekin, Moraza plaza (1.189.230), Isozaki (1.133.958), Iturribide (980.493), Uretamendi (947.262), Ametzola (929.205), Prim kaleko bi igogailuak (908.478 eta 878.442), Maurice Ravel (855.630) eta Basurto Bekoa (842.655).
Halaber, igogailu guztien urteko funtzionamenduaren erabilgarritasuna %98,8koa izan da, funtzionamenduko denbora teorikoaren eta matxura edo gorabeheraren bategatik geratuta egon diren denboraren arteko aldea neurtuta.
Bilboko Udalaren Mugikortasun eta Jasangarritasun Sailaren barruan dagoen Artxandako Funikularra Sozietatea da funikular, igogailu, arrapala eta eskailera mekanikoen mantentze, zaintza eta gainbegiraketa lanak egiteko arduraduna. Sarbideetan eta kabinetan kamerak daude bideo zaintza egiteko eta zuntz optikoaren bidezko konexioa dago, igogailuak sozietatearen bulegotik martxan jarri eta gelditu ahal izateko.
Alfonso Gil Mugikortasun eta Jasangarritasun Saileko zinegotzi ordezkari eta alkateordeak gogoratu du irisgarritasuna "lehentasuna" dela Bilboko Gobernu Taldearen lana planifikatzen denean. "Hortaz, helburu nagusia auzoetako irisgarritasuna hobetzea da, uriaren gainerako guneekin lotzea eta zuzeneko lotura sortzea garraiobide publiko nagusiekin", esan du.
Hirian dauden 31 igogailuez gain, gaur egun 20 bat arrapala eta eskailera mekaniko daude bost lekutan, adinekoen eta mugitzeko arazoak dauzkaten pertsonen irisgarritasuna bermatzeko asmoz. "Goiko auzoetako batzuek orografia zaila izan arren, Bilbo da, Bartzelonaren atzetik, mota horretako elementu gehien daukan Espainiako bigarren hiria eta lehena biztanleen kopuruari begiratuta", azaldu du.
