BILBO, 24 Oct. (EUROPA PRESS) -
Bilboko Udaltzaingoak kanpaina bat egingo du larunbat honetatik, urriaren 25etik, azaroaren 2ra, alkoholaren eta drogen kontsumoak gidatzean daukan eraginei buruz kontzientziatzeko. Ekimena Euskal Herriko Bide Segurtasuneko Plan Estrategikoak zehaztutako Zaintza eta Kontrolerako Plan Bereziaren barruan dago.
Zaintza mota guztietako bideetan areagotuko da, batez ere zirkulaziorik handiena daukaten bideetan (hiriko bideak eta hiriarteko bideak), faktore arriskutsuenetako bat prebenitzeko. Izan ere, auto istripuetan izaten diren hildakoen ia %30 eragiten duen faktorea da. Bilboko Udaltzaingoak eskuratutako datuak taula batzuetan sartuko dira, alkoholemia kontrolatzeko aurreko kanpainetan lortutakoekin batera.
Gidariek eta bideetako erabiltzaile guztiek egin behar dituzte alkohola eta drogak detektatzeko probak, trafiko istripu batean nahastuta daudenean edo arau hauste bat egin dutenean.
Legeak beren beregi debekatzen du gidari baten organismoan drogak egotea (salbuespena dira medikuaren aginduz eta helburu terapeutiko batekin erabiltzen direnak). Arau hauste administratibo hori 1.000 euroko isunarekin zigortzen da eta sei puntu kentzen dira gidabaimenetik.
Era berean, baimendutako tasa baino handiagoarekin gidatzea 500 euroko isunarekin zigortuko da; 1.000 euro izango dira gidaria berriro harrapatzen bada (hau da, aurreko urtean arrazoi beragatik zigortu badira) eta baimendutako alkohol tasaren bikoitzarekin gidatzen dutenen kasuan.
