BILBO, 14 (EUROPA PRESS)
Bizkaibus enpresa publikoak zerbitzu zuzen berri bat jarriko du Bermeotik Bilbora Sollubetik joateko goizeko 07:20an, datorren astelehenetik aurrera, ekainaren 19tik aurrera. Horrela, astelehenetik ostiralera Bermeotik Bilbora joateko hiru zerbitzu zuzen izango dira goizean goizetik, ordu erdiro: orain arteko biak, 06:50ean eta 07:50ean, eta orain jarri berri dena, 07:20an. Uztaileko lanegun guztietan mantenduko dira hiru zerbitzuak.
Bizkaiko Foru Aldundiak jakinarazi duenez, A3527 Bilbo-Mungia-Bermeo (autobidea) lineak bi ibilbide desberdin egiten ditu egunean zehar. Bata ohikoa da, 07:00etatik 22:00etara orduro eskaintzen dena lanegunetan eta larunbatetan, eta Etxetxubarrin -erabiltzaileren batek hala eskatuz gero- eta Mungian gelditzen da.
Beste zerbitzua zuzena da eta 06:50ean eta 07:50ean eskaintzen da, lanegunetan, eta ez da geratzen ez Etxetxubarrin ez eta Mungian ere. Zerbitzu horren bitartez, erabiltzaileak 45 minutuan heltzen dira Bilbora, "zerbitzu hobea eskainiz ohiko zereginetara doazen erabiltzaileei". Zerbitzu zuzena bidaiari ugarik erabiltzen dute Bermeon goizean goizetik, eta orain beste autobus bat jartzea erabaki da, 07:20an.
