BILBO, 11 (EUROPA PRESS)
Bizkaiko Foru Aldundiak 2016-2017 Eskola Kirola programaren eskolarteko finalak egingo ditu maiatzaren 13 eta 14an eta 20 eta 21ean, Sestao, Ortuella, Barakaldo, Bermeo, Bilbo, Durango, Sopela eta Getxon. Finaletan 6.000 eskola umek baino gehiagok hartuko dute parte, antolatutako 30 diziplinatan baino gehiagotan.
Gimnasia erritmokoa, aerobica, eskubaloia, boleibola, herri kirolak, karatea, abiadura patinajea, lerroko patinen gaineko hockeya, patinaje artistikoa, gynkana, mahai tenisa, hondartzako boleibola, skateboarda, futbola, igeriketa, igeriketa sinkronizatua, xakea, saskibaloia, tenisa, arraunketa, piraguismoa, eskupilota, zesta punta, trinketeko pala, atletismoa, mendia, eskalada eta errugbia dira kirol modalitate horietako batzuk, eta parte hartzaile guztiek kamiseta bana jasoko dute sari gisa.
Bizkaiko Aldundiak jakinarazi duenez, Eskolarteko Jokoetan lehiaketa jardueren finalak eta hastapen jardueren finalak (mendia) batuko dira. Horrez gain, aukera ona izango da Bizkaiko gizarteak beste kirol modalitate batzuk ezagutzeko, esaterako, tikiboxa.
Halaber, eskolarteko finaletan ez da faltako Heziki, Bizkaiko Aldundiaren apustu garrantzitsuenetako bat. Heziki 2014-2015 ikasturtean martxan jarritako ekimena da. Helburua da trebetasun motorrak eskuratzeko hain garrantzitsua den etapa batean haurrak prestatzea kirol erronkak lortzeko, beti kontuan hartuta etapa horretan zer gaitasun eta trebetasun garatu behar dituen.
Parte hartzen duten Bizkaiko udalerrien lankidetzari esker da posible ekimen hau egitea, kirolguneak eskaintzen baitituzte. Aurten Sestao izango da jokoen egoitza nagusia, baina beste udalerri batzuetan ere egingo dira finalak, hain zuzen, Bilbo, Sopela, Ortuella, Getxo, Bermeo, Barakaldo eta Durangon.
